Mawkyrwat, Nohprah 16: Ka Mawten Sports Club ka la long ka kynhun ba rah ïa ka nam lahduh ha ka lympung ïalehkai kynjatbol ba la tip kum ka 2nd Maitshaphrang Under-16 Football League 2024 ba la pynïaid da ka KSU Mawkyrwat Circle ba la pynlong hapoh madan Artificial Turf, Nonglang, South West Khasi Hills District.
Ka jingrah nam laduh jong ka Mawten Sports Club ka dei hadien ba ka la jop noh da 2 – 1 kol pyrshah ïa ka Photjaud-Rangthong Sports Club.
Ïa ki ar kol jong ka Mawten Sports Club la thep da u Pailakordor Lyngdoh ha ka minit kaba 9 bad ha ka extra time kaba dei ha ka minit ba 64. Katba ka Photjaud-Rangthong SC pat ka la ïoh ïa ka shi kol na u Daniel Iawphniaw ha ka minit ba 30 lyngba ka penalty.
Ka lahduh ha kane ka lympung ïalehkai ka la ïoh ban khur T. 30,000/- lem bad ka khusnam bad kaba wan ba ar ka la ïoh ïa ka song tyngka ba T. 20,000/- lem bad ka khusnam. Ym tang kata, ha kane ka lympung la ïoh ruh bna sam ïa ki khusnam shimet kata ka nam kum u nongïalehkai ba tbit tam la ïoh da u Heprit Danial Iawphniaw jong ka Photjaud Rangthong Sports Club, u nongthep bun kol dei u Heprit Pailakordor Lyngdoh jong ka Mawten Sports Club uba la thep haduh 7 kol, u nongapkol ba tbit dei u Heprit Iateiboklang Shangdiar jong ka Rangthong CC&SA bad ka kynhun ba long biang por ha kiei kiei ne Discipline Team la ïoh rah da ka Youngest Boys Football Club.
U bah Samuel B. Jyrwa, Chairman jong ka North East Students’ Organisation (NESO) haba kren kum u kongsan u la ong ba ka jingpynlong jong ka KSU Mawkyrwat Circle ïa kane ka lympung ïalehkai kynjatbol jong ki khynnah ba hapoh ïa ka 16 snem ka long kaei kaei kaba donkam haduh katta katta namar ki khynnah ki dang long kum ka dewbyrtha kaba dang jem bad ka shong ha ngi kumno ban pynwan dur bad saiñ dur ïa ki, namar ynda ka la eh ne long ryngkhiang lada ngi kwah ban pynwan dur kam long shuh bad ka kdiah kumta ha kata ka por kan sa slem bad shim por ban pynbha. Namarkata, u kyntu ba katba ki dang don ha ka karta kaba dang rit ka donkam ïa ki nongïalam bad ki riew rangbah ba kin hikai bha ha ka rukom kaba dei khnang ba ma ki kin sa long kum kita ki nongmuna ïa ka ïing ka sem, ka shnong ka thaw, ka dong ka thaiñ, ka ri bad ka jaidbynriew.
U la pynkynmaw ruh ba ha ki por ba mynshwa ki jingïalehkai ki kut tang ha ki jingïalehkai hynrei ha kane ka juk mynta, kino kino ki jait jingïalehkai lada ki nongïaleh ki shimkhia ka lah ban long ka lad ban kamai jakpoh. U kyntu, namarkata, ba lada ki kwah ban kiew ha ki jingïalehkai, ki nongïaleh kim dei ban ngop ha ki jingdih ba pynbuaid kiba lah ban long ka daw jong ka jingpynjot ne pyntroiñ ïa ka jingim bad ïa ka jingthmu jong ki.
Kiwei de kiba la ïa donlang ki long u bah Raymond Kharjana, Organizing Secretary ka KSU Central Body kum u Symbud Kongsan ha ryngkat ka jingdonlang u bah Forwardman Nongrem, President KSU South West Khasi Hills District, ki nongïalam ka M.D.S.A, u samla Chesterpaul Lyngdoh, ki riewrangbah ka thaiñ, ki nongïalam jong ka seng lem bad kiwei kiwei.
