Jowai, Ïaïong 07: Ka jingïalehkai District Cricket League 2026 bala pynïaid da ka West Jaiñtia Hills District Cricket Association (WJHDCA) kala poi sha kaba kut mynta ka sngi 7 tarik ha Khliehtyrchi Mini Stadium, ha ka jingïakhun Final hapdeng ka LionY&SA bad Goodwill Mupliang SC ha kaba ka Lion Y&SA kala jop da 53 runs.
Ha ka inning ba nyngkong, hadien ba ka Goodwill Mupliang ka la jop ïa ka jingkynting pisa bad jied ban kawang bol, ka Lion Y&SA ka batied nyngkong ka la kamai 160/8 ha ki 25 overs. U Firstbornson Dkhar u la long uba kongsan ha ka batting da kaba kamai 43 runs, katba u Nick Dann u la pynbud da 27 runs. Na ka liang ka Goodwill Mupliang SC, u Echwa Phawa bad u Byforcestar Dhar ki la shim mar 3 wickets.
Haba beh ïa ka thong ka Goodwill Mupliang SC ka la shah pynhap lut tang ha ka 107 runs ha ki 24.3 overs. U Echwa Phawa u la long uba kamai bun tam da 27 runs. U Nick Dann u la leh bha ha ka bowling da kaba shim 4 wickets tang 18 runs, kaba la ïarap shibun ban pynjop ïa ka kynhun jong u bad u la ïoh ruh ïaka Nam Man of the Match mynta ka sngi.
La sam ruh ïa ka Nam Most Promising Player jong kane ka League sha u George Branly Tariang jong ka War Jaiñtia United. ïa ka Nam Best Batsman bad Man of the Tournament jong kane ka League la ïoh rah da u Byforcestar Dhar (340 run bad 6 wickets na ki 6 innings) jong ka Goodwill Mupliang SC uba ïoh bun run eh na baroh ki Nongtied ha kane ka League. La sam ruh Ia ka Nam Best Bowler sha u Conard Sana (17 wickets na ki 6 innings), u nongkawang bol jong ka The Legend (Lissi Pearl) u ba ïoh ban pynhap bun wicket ha kane ka League.
Ha kane ka sngi, la wan ban sakhi ïa ka jingïalehkai da u Chief Guest Wailadmiki Shylla, uba dei u MLA bad Minister of Sports & Youth Affairs etc. jong ka Sorkar Meghalaya, ryngkat bad u Guest of Honour Medling Swer, MDC, Executive Member ka JHADC. La don ryngkat ruh u ma Khroobok Passah, uba dei u Asstt. Director jong ka Sports & Youth Affairs, jong ka Sorkar Meghalaya kum u nongshahkhot sngewbha ba kyrpang bad kiwei kiwei de ki nongshahkhot sngewbha nalor U President ka Association, u Ma Eddy S. Shylla, ki Vice-Presidents, General Secretary bad kiwei ki Dkhot jong ka Association.
Ha ka jingkren jong u, ha ka Programme shuwa ka jingai khusnam, u kongsan u la ai jingïaroh ïa ka Association kaba la lah ban pynlong ïa kane ka league bad ban kyntiew ïa ki samla ha ka jingïalehkai cricket. U la ai ka jingïaroh ïa baroh ar ki kynhun kiba la poi sha ka Final khamtam ïaka team kaba long ka nongjop bad u kitbok kitrwiang ïaka kynhun ba wan ba-ar ban nang ïai trei shitom shakhmat. U la kyntu ruh ïa ki nongïalehkai kriket ban trei shitom shuh shuh khnang ba kin lah ban mihkhmat ïaka Jylla lane ka ri kumjuh ban ïoh ban shim bynta ha ka League bapawnam ka India, ka IPL.
U la ai jingmut ruh ïaka Association lada long kaba lah ban pynlong khambun ki Tournament ha ka shi snem khnang ba ki samla ba ieit ïaka Kriket kin kham ïoh lad khambun ban ïoh ïalehkai. Ha kaba ïadei bad ka madan ïalehkai kriket ha Mukhla ka ba ma u hi u u la ïarap ban pynïoh lyngba ka Dorbar Shnong Mukhla, u la ong ba katba lah ka bor jong u kum u nongmihkhmat paidbah bad u Sports Minister un ïakren bad ka sorkar khnang ba ka Sorkar kan ai jingïarap katba ka lah ban pyndep trei ïaka khnang ba ka Association kan suk ban pynlong ïa ki Tournaments bapher bapher. U la pynkut ïa ki jingkren da ka ba ai khublei ïaka Association bad u kitbok kitrwiang ïa baroh ki Dkhot jong ka ba kin ïai trei shitom bad u ruh un don ryngkat bad ka Association ban kyntiew ïaka jingïalehkai Kriket hapoh ka District.
Ha ka jingai khusnam, u kongsan u la sam ïa ka khusnam Champion Trophy sha ka nongjop ka Lion Y&SA, katba u symbud kongsan u la sam ïa ka Runner-up Trophy sha ka Goodwill Mupliang SC.
