Shillong, Ïaïong 24: Ka shi kol ba la kum thep bakla hi sha kol lajong da u Habamut Nongrum katto katne minit shwa ban kut ka kylla miet jong ka Extra Time ha ka jingïakhun phainal jong ka 1st Shortimai Knockout Football Tournament ka la pynlong ia ka Youngster FC ban hap shu hun noh kum ka nongjop ba ar jong kane ka lympung.
Na kane ka kol ka Lamare FC ha ka jingïakhun phainal ha ka 23 tarik u Ïaiong, 2022 , ka la ïoh ban long ka nongjop ba nyngkong jong kane ka lympung ïalehkai phutbol ba la pynlong da ka Seng Samla Smit Pyllun bad Smit Sports Club mynta u snem.
Ka jingïakhun phainal naduh ba sdang haduh ban da kut ka por ba la buh ka la long kaba ïakhaid bha ha kaba baroh ar tylli ki kynhun ki la ïaleh shitom ban ïoh pynkhih jar hynrei kim shym la lah ban pyndonkam bha ïa ki kabu thep kol ha baroh ar kylla.
Hapdeng u paidbah palat phew hajar ngut uba la wan sakhi ïa kane ka jingïakhun phainal, ki bor pynïaid ki la rah ïa kane ka jingïakhun sha ka Extra Time. Ha ka kylla step ha ka extra time ruh kine ki ar kynhun ki khlem satia ban leh eiei.
Hynrei ha ki minit shwa ban kut ka kylla miet, ka Lamare FC ka la ïoh ban ban shut ïa ka Free-kick bad ha ka jingïatbeh ïa ka bol u Hamarbamut u la kum ïoh pakhuh bakla ïa ka bol da ka khlieh bad leit rung jlang shapoh ka kol ïa kaba u nongap kol ka Youngster FC ban nym lah leh eiei shuh.
La sam ïa ki khusnam sha baroh ar kynhun ha ka jingïadon lang u Bah Banteidor Lyngdoh, Myntri ba dei khmih ïa ka tnad Sports ka Sorkar Jylla, u Bah Lambor Malngiang, MLA ka Nongkrem, u Bah Pynshongdor L Nongbri, Sordar ka Shnong Smit, ki nongmihkhmat na ka Company Amrit Cement, ki nongïalam shnong na ki dorbar shnong bapher bapher nalor kiwei pat.
Ka lahduh jong kane ka lympung ka la ïoh ban khur ïa ka khusnam pisa ba 2 lak tyngka ryngkat ka trophy, katba kynhun kaba wan ba ar ka la ïoh pdiang ïa ka khusnam pisa ba 1 lak tyngka lem ka trophy.
Ha kane ka sngi la sam ruh ïa ki khusnam sha ki nongïalehkai kiba la ïalehkai bha ha kane ka lympung kum ka khusnam Best Goalkeeper, Best Player of the Tournament, Top Scorer, Player of the Match bad Best Discipline Team.
