Shillong, Ïaïong 21: Ka kynhun ki rang bad thei ïalehkai jong ka Petroleum Sports Promotion Board (PSPB), kila khur ïa ka trophy lahduh ha ka lympung ïalehkai Table Tennis kaba la tip kum ka 83rd Senior National and Inter-State Table Tennis Championships kaba la long ha SAI Indoor Stadium ha ka sngi Palei.
Na bynta ki shynrang kadei ka jingjop kaba arphewsan sien ha kane ka lympung, katba ha ka liang ki kynthei kiba khlem poi sha ka thong ha ka jingpynlong ha Hyderabad, kadei ka sien jop kaba khad hynriew. Ka kynhun ki rang bad thei ïalehkai ka PSPB kila khur nam lahduh hadien ba kila pynliem noh da 3-0 pyrshah ïa ka kynhun jong ka Maharashtra.
Kam long kaba suk na bynta ka kynhun jong ki shynrang ban jop ha kane ka jingïalehkai, ha kaba u Sharath Kamal uba dei ruh u kapten u la hap ban shong ben noh ïalade bad ailad pat ïa u Manav Thakkar ha ka jingïakhun final. Ki rangïalehkai ka Maharashtra ba kynthup ïa u Deepit R Patil, Siddhesh Pandey bad Jass Modi kila hap ban ïakhun tyngeh ban pynliem ïa ki nongïakhun pyrshah.
U Deepit u la lah ban ïalehkai bha ha ka jingïakhun kaba nyngkong da kaba khur point arsien pyrshah ïa u Sathiyan. Pynbna utei u rangïalehkai kynsai ka PSPB u Sathiyan u la lah ban khanglad bad ïalam ïa ka kynhun da 1-0. U Harmeet ruh u la rem noh hakhmat u Siddhesh Pandey. Hynrei u Jash Modi uwei na ki rangïalehkai dang khie Maharashtra PSPB u la lah ban ïakhun pyrshah ïa u Manav. U Manav u la rem noh ha kaba sdang ka jingïakhun hashwa ba un khyrwit khur point biang. Ka jingïakhun kala nang ïakhaid bad na ka liang u Modi u la jop biang ha ka wat ïakhun kaba saw.
Baroh arngut, u Sharath bad Sathiyan kila ai ka jingïaroh na bynta ki arngut ki rangïalehkai ba dang khynnah jong ka Maharashtra. “U Deepit uba shyrkhei bha, bad nga ruh kumjuh nga la shem jingeh bha,” ong u Sathiyan.
Na ka liang u Sharath, u la ïaroh ïa u Deepit bad Jash, da kaba ong, “Baroh arngut kidei kiba kiew bha bad don ka sap ïalehkai.” Ka Maharashtra A kala rung teng mynshwa sha ka final.
Haba phai sha ka liang ki kynthei, ka Archana Kamath kala lah ban khur jingjop ha ka jingïalehkai kaba nyngkong, kaba la pynlong ïa ka PSPB ban wanphai biang sha ka nam lahduh. Ka Archna bad Diya Chitale, ki khlem la duh point ha kane ka jingïakhun. Dei ka Archana kaba la lah ban khanglad ïa ka jingkhur point ka Diya. Katba ka Diya, kaba la lah ban ïalehkai bha naduh kaba sdang haduh ka semifinal, ka la mad noh ka nam rem hakhmat ka Archana da 3-0 kaba la rah syndon ïa ka nam lahduh.
Da kaba lamkhmat da 1-0, kadei ka jingïalehkai kaba ju ïai jia na bynta jong ka Manika Batra ha ka wat ïakhun kaba at. Ka Swastika Ghosh, kawei na ki thei ïalehkai jong ka Maharashtra, ka khlem lah ban khanglad pyrshah ïa ka Manika, kaba la ïakhun tyngeh ha kane ka sngi. Ka Swastika ka khlem lah ban pynphai point ïa ka Manika. Ha ka wat ïakhun kaba laisien, ka Swastika kala lah ban ïalehkai bha khur ïa ki point. Ka Swastika kala lah ban kyrda laisien, hynrei ka Manika kala jop ha ka wat ïakhun kaba saw ban pynliem da 3-0.
Katba ka Reeth Rishya kaba dei sa kawei ka thei ïalehkai jong ka PSPB kala pynliem noh ïa ka Anannya Basak da 11-6, 5-11, 11-8, 11-7).
Ka sien ba khadduh ba ka PSPB kala jop lahduh kadei ha ka Ranchi Nationals ha kaba ka Manika kala ïarap ïa ka kynhun ban khur biang ïa katei ka nam lahduh da kaba pynliem ïa ka Reserve Bank of India ha ka jingïakhun kaba ïakhaid bha. Ka PSPB ha katei ka jingïakhun ka jop da 3-2. Katba ka kynhun jong ka Maharashtra A khadduh eh kala jop ha ka 73rd Nationals kaba la long ha Lucknow ha u 2022.
