Shillong, kyllalyngkot 28: Ka Donkins CC ka la pynliem noh da 3 wiket ïa ka Lawsohtun CC ha ka jingïakhun phainal ban pynthikna ïa ka nam lahduh ha ka Cricket League First Division 2026 jong ka Shillong Cricket Association. Kane ka jingïakhun phainal ka la long ha ka sngi Ba-ar (27 tarik Kyllalyngkot).
Haba tied nyngkong hadien ba jop ïa ka jingkynting pisa (toss), ka Lawsohtun ka la shah pynkhyllem noh baroh 10 wiket tang na ka bynta 135 ron haki 36 ober, shuwa ba ka Donkins kan pyndep ïa ka kamram ban kamai 136 ron tang haki 30.3 ober.
Ha ka pali tied jong ka Lawsohtun, kiba la pawkhmat ha ka tied ki long u Peter Lyngkhoi (42 ron naki 74 bol) bad u Edmund Dhar (21 naki 36 bol). Katba u Agreas Cham Cham Sangma (8 ober: ailad 16 ron) bad u Pynkop Bonney (4 ober: ailad 16 ron), nongkawang bol jong ka Donkin, ki la lamkhmat ha ka boling da kaba khur mar 3 wiket.
Nangta kiba la lamkhmat ha ka tied na ka bynta ka Donkins ki long u Bhuwan Thapa, uba la noh synñiang 50 ron naki 54 bol bad u Agreas Chamcham Sangma, uba la kamai 28 ron naki 47 bol.
Na ka bynta ka jingïalehkai kyrpang ha baroh ki liang, u Agreas u la shah jied ban khur ïa ka khusnam Player of the Final. Nalor jong u, ki la don ruh katto katne ki khusnam shimet, ha kaba u Hilarious jong ka Lawsohtun u la khur ïa ka nam Best Bowler, katba u Rohit Rai jong ka Donkins u la khur ïa ka Player of the Tournament.
La wan kongsan ha kane ka sngi da u bah Rayonald Kharkamni, uba long Secretary jong ka Meghalaya Cricket Association, ha ka jingsakhi lang u bah Eddystone Shylla, Honorary Treasurer ka MCA.
Kum ka lahduh ka Donkins ka la ïoh khur ïa ka khusnam pisa kaba T.35,000, katba ka Lawsohtun ka la khur ïa ka khusnam pisa kaba T.17,500.
