Mawkyrwat, Naiwieng 27 : Ka Auro Sports Club ka la long kawei na ki kynhun lahduh hadien ba ka la pynliem noh da 2 – 1 kol pyrshah ïa ka Nongbah Rangblang Sports Club ha ka lympung ïalehkai kynjatbol kaba la tip kum ka 1st Rowell Lyngdoh Memorial Football Tournament 2022 kaba la pynïaid da ka All Meghalaya Trinamool Congress Party jong ka Mawkyrwat Block hapoh Madan jong ka St. Mary’s Mini Studium Rangblang, South West Khasi Hills District.
Kane ka lympung ïalehkai kynjatbol ka long kum shibynta ban kynmaw burom ïa u bah Rowell Lyngdoh (bam kwai ha dwar U Blei) uba la noh synñiang shibun ïa ka South West Khasi Hills District bad ïa ka jylla Meghalaya baroh kawei.
Nalor ka jingïalehkai kynjatbol, na ka liang ki nongpynïaid ki la ïoh ruh ban pynïalehkai paralok ïa ki ar ki jingïalehkai kata ka basketball ha kaba ka Rangblang Area ka la jop da 27 la 13 set pyrshah ïa ka MCSEPAC Mawkyrwat Block, katba ha ka jingïakop tan tyllai (Tug of War) pat ka Rangblang Area ka la jop da 2 – 0 point ïa ka MCSEPAC Mawkyrwat Block bad kine ki dei ha ka jingïalehkai jong ki kynthei.
Ha kaba kut jong ka jingïalehkai la ïoh ruh ban sam ïa ki khusnam sha baroh ki kynhun kiba la poi sha ka thong jong ka jingjop bad kumjuh ruh sha ka kynhun kaba la wan ba ar bad kumjuh ruh ïa ki khusnam shimet.
Kiba ïadonlang ha kane ka sngi ki long naduh u bah Sounder Strong Cajee, kyrtong jong ka TMC Mawkyrwat Constituency, u bah Diverland Lyngdoh, u Brother Pascal Dkhar, Parish Priest jong ka Rangblang Parish, u Rangbah Shnong ka Rangblang Sohsynñiang lem bad kiwei de ki ‘riew rangbah jong ka dong ka thaiñ.
