Khliehriat, naiwieng 13: Ka Umshongpet Sports Welfare Organisation ka la rah ïa ka nam lahduh hadien ba ka la pynliem ïa ka Elite three -Latyud FC ha ka lympung ialehkai football kaba tip kum ka 15th Cash Prize Knockout Football tournament ba la pynlong da ka Moopynieiñ Socio Cultural & Sports Organisation kaba don ki kyntien phira “Say no to Drugs ,yes to sports”, kaba la pynlong hynnin ka 12 tarik naiwieng 2025.
Hapdeng ka jingialehkai kaba shongshit bha bad ba ïa ryngkat bor na baroh ar liang, ka Umshongpet SWO ka la jop da kaba shut tie-breaker 4 kol -2 kol pyrshah ia ka Elite three Latyud FC .
Ïa ka program ha kane ka Football tournament jong ka Moopynieiñ Socio Cultural & Sports Organisation la pynïaid da u President ka club MSCSO u bah Hamewanpynhun Ryngkhlem bad u kongsan ha kane ka sngi ba pynhap pyrda ïa ka tournament u dei u MLA jong ka Khliehriat u bah Kyrmen Shylla bad u symbud kongsan u Dr Sanky Shangpung uba dei u MDC bad uba bat ruh kum u Chairman jong ka Jaiñtia Hills Autonomous District Council, la ïa don ryngkat lang ruh u bah Dame wailadshwa Siangshai, u Advocate , u bah Kerlang Ksoo, u Asst General secretary ka Dorbar dong Moopynieiñ, u bah Reachingson Siangshai lem bad kiwei kiwei ki riew rangbah.
