Rah ka West Khasi Hills ïa ka nam lahduh jong ka U-23 Women’s Inter District Cricket Tournament 2022

Shillong, Ïaïong 05: Ka West Khasi Hills kala khur ïa ka nam lahduh jong ka lympung ïalehkai U-23 Women’s Inter District Cricket Tournament 2022 da kaba bteng khur jingjop bad don hakhlieh duh napdeng baroh ki team bala ïashim bynta.
Ka West Khasi Hills kala rah ïa ka nam lahduh hadien ba kala pynliem noh da khyndai wicket pyrshah ïa ka South Garo Hills ha ka jingïakhun final jong kane ka lympung bala pynïaid da ka Meghalaya Cricket Association ha Nongstoiñ.
Ha ka jingkynting pisa ka West Khasi Hills kaba la jop kala ailad tied nyngkong ïa ka South Garo Hills ha kaba kala shah pynkhyllem lut baroh ki wicket da kaba kamai tang 67 ron ha ki 67 in 20.3 over, ïa kaba ka WKH kala lah ban kynjoh sha katei ka thong da kaba duh noh tang shi wicket ha ki 12 over.
Ka Evanrilin S Syiem ka dei ka namtam ha ka liang ka kawang bol ha kane ka jingïalehkai da kaba khur san wicket ai kamai tang khyndai run ha ki 3.3 over, katba ka Ridahun Nongsiej ka ïarap khur 2 wicket ai kamai 17 ron bad ka Sara Dafica Kharbani ka ïoh 2 wicket ai kamai 23 ron.
Ka Smillin N Sangma kadei tang ma ka marwei kaba kamai bun don na bynta ka South Garo Hills kata da 13 ron.
Haba beh ïa katei ka ron, ka Sildamicresha Marbaniang kala khyrwit 38 ron na ki 39 bol (not out) bad ïalam ïa ka kynhun sha ka nam jop da khyndai wicket. Ka Evanrilin S Syiem kala khur ïa ka khusnam Player-of-the-match, katba ka Sildamicresha Marbaniang kadei ka thei ïalehkai kaba kamai bun ron tam ha kane ka lympung ïalehkai Inter District Cricket da kaba pyndep kamai 213 ron.
Ka Jaylynn M Marak jong ka South Garo Hills kadei ka thei ba khur bun wicket da 15 wicket, hynrei sniewbok ha kane ka jingïakhun final ka khlem ïoh khur wicket.
Ka West Khasi Hills kadei ka team kaba khlem shah rem shisien ruh ha kane ka lympung bad jop lynter ha baroh ki jingïakhun group stage haduh ka final ba kan da ïoh rah syndon ïa ka nam lahduh.
Ha kane ka jingïakhun final la sakhi lang ruh ka Kong Balarina Syiem kaba dei ka District Sports Officer jong ka West Khasi Hills kum ka kongsan. Nangta la donlang ruh ki dkhot jong ka Meghalaya Cricket Association (MCA) ba kynthup ïa u Bah Gideon Kharkongor uba dei u Honorary Secretary, u Honorary Treasurer u Dhrubajyoti Thakuria bad u Bah Dister Marbaniang uba dei u Chairman jong ka Tournament Committeeha ryngkat ruh ki dkhot jong ka West Khasi Hills District Cricket Association bad South Garo Hills District Cricket Association.