Rah ka Umpyrdong bad Lyntijam ïa ka nam lahduh ha ka lympung ïalehkai phutbol ka UDP ha Umlakhar

Nongpoh, Nailar 11: Hadien ka jingïaid shaphrang jong ka lympung ïalehkai phutbol bala pynlong da ka United Democratic Party Youth Wing, Mawlong Sub-Circle bala wan ruh ban shim bynta kumba 32 tylli ki kynhun jong ki shynrang bad 8 tylli ki kynhun ki kynthei katei ka lympung kala poi noh sha kaba kut hadien ka jingïakhun phainal bad pynhap pyrda mynta ka sngi ha madan ïalehkai ka shnong Umlakhar.
Ïa katei ka lympung la wan ban pynhap pyrda da u Samla Eugeneson Lyngdoh uwei naki rangïalehkai phutbol ba kynsai ka jylla bad ri India ba dei ruh u MLA ka Mawphlang kum u kongsan haka jingdonlang u Bah Balajied Ranee MDC ka Nongpoh, Bah Donbok Khymdeit President ka UDP Ri-Bhoi District, ki nongkitkam jong ka UDP Youth Wing Mawlong Sub Circle bad kiwei kiwei ki riew rangbah.
Haba phai pat sha ka jingïakhun phainal ha katei ka sngi ki la long ha ki ar bynta haka liang ki kynthei bad shynrang, bad haka jingïakhun phainal ba nyngkong haka liang ki kynthei ka jingïaleh kala long hapdeng ka Lynti Jam FC pyrshah ïaka Mawlong FC ha kaba ka Lynti Jam FC kala lah ban pynliem noh ïaka Mawlong FC da 2-0 kol.
Haba phai sha ka jingïakhun ki shynrang, kala long hapdeng ka Kroh SC pyrshah ïaka Umpyrdong FC ha kaba ka jingïakhun kala long kaba shongshit bad ïakhaid bha da ka jingtbit ki rangïalehkai na baroh ar kynhun bad naduh ba sdang ka kylla step haduh ba kut ka kylla miet ka jingïalehkai kala kut noh hapdeng ka jingïakhaid da 2-2 kol bad naka liang ki referee kila rai ban pynshut noh da ka tie breaker.
Dei haka jingshut tie breaker ba ka Umpyrdong FC kala lah ban pynliem noh ïaka Kroh FC da 6-5 kol ban rah syndon ïaka nam lahduh jong katei ka lympung. Haba kren ha katei ka sngi naka liang u Samla Eugeneson Lyngdoh uwei naki rangïalehkai ba kynsai jong ka ri u ba la long ruh u nongmihkhmat haka jylla na Mawphlang Constituency u la ai ka jingïaroh ïaki samla ïalehkai katei ka thaiñ khamtam naduh ki kynthei kila shim bynta shitrhem ha katei ka lympung ban pyni ïaka sap ka phong kaba ki don haka kam ïalehkai phutbol.
U la ai jingïaroh ruh ïaki samla ïalehkai katei ka thaiñ halor ka sap kaba ki don da kaba ai nuksa ruh ïaki rang bad thei ïalehkai ka jylla kiba la mihkhmat ïaka ri mynta ban long ki rang bad thei ïalehkai ba kynsai kiba la lah pat ban kyrshan ïaka iing ka sem bad bunsien ki rang bad thei ïalehkai kiba paw ka jylla ki dei kiba wan naki thaiñ nongkyndong. U la ai mynsiem ruh ïaki samla ba kin pyndonkam hok ïaka sap kaba ki don namar ka kam ïalehkai ka long kawei naki lad kamai naka bynta ki samla kiba don shisha ïaka sap, u la bynrap.