Nongpoh, Jymmang 21: Ka lympung Ïalehkai ball jong ki Heprit kynthei bad shynrang kiba hapoh 12 snem ka rta kaba la tip kum ka Chief Minister District Level U-12 (Boys & Girls) Football Tournament ba la pynïaid daka ophis u District Sports Officer, Ri-Bhoi District ka la poi noh sha kaba kut, hadien ba la pynhap pyrda noh ïaka haka sngi Saijaiñ ha madan NSCA Pahamsyiem.
Ha katei ka lympung naka liang ki kynthei ka kynhun jong ka Block Bhoirymbong ka la long ka lahduh bad na ka liang ki shynrang ka kynhun jong ka Umling Block ka la long ka lahduh napdeng 4 tylli ki Block kiba la wan ban shim bynta kiba kynthup ïaka Umling Block, Jirang Block, Bhoirymbong Block bad ka Umsning Block bad naka liang ka ophis u DSO ka la pynbna ruh ïaki kyrteng jong ki 21 ngut ki heprit jong ki kynthei bad shynrang na baroh 4 tylli ki block kiba la shah jied ban wan pyntriem shuh shuh naka bynta ban ïoh leit mih khmat sha ka Inter State Level ka ban sa long ha nongbah Shillong.
Ïa katei ka lympung la wan ban pynhap pyrda u Bah Eric Kevin Dkhar BDO ka Umling C&RD Block kum u kongsan haka jingïadon ryngkat lang u bah Ronaldkydon L Nonglait, Professional & State Football Player, Samla Hardy Cliff Nongbri, Professional & State Football Player, Samla Liza Muktieh, State Football Player & Futsal India, u Bah Bobby L Nongbet, DSO Nongpoh, ki kmie ki kpa jong ki heprit bad kiwei kiwei.
Haba phai sha ka jingïakhun phainal jong ki khynnah kynthei ka kynhun na Bhoirymbong Block ka la lah ban pynliem noh ïaka kynhun na Umling Block daka jingïashut Tie-breaker. Bad haka jingïakhun jong ki khynnah shynrang ka kynhun na Umling Block ka la lah ban pynliem noh ïaki ka Umsning Block da 3 kol la 0. Ha kaba kut jong katei ka jingïalehkai, naka liang ka ophis U DSO ka la sam ïaki khusnam sha ki nongjop bad sha ki kynhun kiba wan baar.
Kum ban nangai mynsiem ïaki heprit kiba la wan ban ïa shimbynta ha katei ka lympung kiba la lehkai bha naka liang ka ophis u DSO ka la sam ruh ïaki khusnam shimet sha ki nongïalehkai kiba kynshai ki heprit khynthei bad shynrang hakaba ïaka nam Best Player naka liang ki heprit khynthei la ïoh da i Ilabynta Lyngdoh naka kynhun Umling Block bad naka liang ki heprit shynrang ïaka nam Best Player la ïoh rah da u Faster Saring naka kynhun Bhoirymbong Block.
Haba kren ha katei ka sngi naka liang u kongsan u bah Eric Kevin Dkhar, BDO ka Umling u la pynpaw ka jingkmen ban ïohi ïaki sap jong ki heprit hakaba u la sakhi ïaka jingïalehkai kaba itynnad haka jingïakhun phainal jong ki 4 tylli ki kynhun. U la ai mynsiem ruh ïaki heprit kiba la wan ban ïashim bynta ha kane ka lympung ba kim dei ban duh jingkyrmen wat lada ki khlem ïoh ïaka nam lahduh. U bah Eric u la kyntu ruh ïa ki nongjop ba kim dei ban don ka mynsiem sngew meng hynrei ki dei barabor ban long ki ba sngew rit bad ki dei ban dang trei minot shuh shuh khnang ba kin dang kiew shakhmat haki kam ïalehkai football.
