Nongpoh, Nailur 13 : Ka Umden SC kala rah syndon ïaka nam lahduh haka lympung ïalehkai phutbol bala pynlong da ka Ri Bhoi Youth Development & Social Organization (RBYDSO) hadien ba kala lah ban pynliem noh ïaka Umshaken SC haka jingïakhun phainal kaba la long mynta ka sngi ha madan ïalehkai ha Umden.
Ïa katei ka lympung la wan ban pynhap pyrda noh da u Bah S Pasleiñ DSP Headquarter ka Ri-Bhoi District kum u kongsan haka jingdonlang ka kong Marian Maring, ki OC jong ka Nongpoh PS ba kynthup ïa u Bah DSR Lakiang, Bah N Wahlang, ki nongïalam ka RBYDSO naduh u Bah Arnold Syngkli President ka sengkmie, Bah Sebestian Malai President Umden Circle bad kiwei kiwei ki riew rangbah.
Haba phai sha ka jingïakhun phainal ha katei ka sngi hapdeng ka Umden SC pyrshah ïaka Umshaken SC ka jinglehkai ka long kaba shongshit bad itynnad wat hapdeng ka jingpynthud jong u slap, bad hadien ka jingïakhun ba jur ban ïaknieh ïaka nam lahduh naduh ka kylla step haduh ka kylla bad da ka jingtbit ki rangïalehkai ka Umden SC kala lah ban pynliem noh ïaka Umshaken SC da 3-2 kol ban rah syndon ïaka nam lahduh jong katei ka lympung.
La sam ruh ïaki khusnam ha katei ka sngi ha kaba ka Umden SC kala ioh ban khur ïaka song pisa ba T.20 hajar lem bad ka trophy katba ka Umshaken SC kala ioh ban khur ïaka song pisa ba T.10 hajar lem bad ka trophy, ryngkat kiwei kiwei ki khusnam shimet.
