Rah ka St. Paul’s HSS ïaka nam lahduh haka District Level Inter School Athletic Meet u DSO ha Ri-Bhoi

Nongpoh, Jymmang 19: Ka St. Pauls Higher Secondary School Nongpoh kala long ka lahduh haka jingpynhap pyrda noh ïaka District Level Inter School Athletic Meet 2022 ba 3 sngi bala pynlong da ka ophis u District Sports Officer Ri-Bhoi District kaba la sdang naduh ka 17 tarik mynta u bnai ha madan NSCA Pahamsyiem, hadien ka jing ïaid beit ïaid ryntih jong ka lympung da ka jing ïa shim bynta shitrhem jong ki 22 tylli ki skul bapher bapher ka Ri-Bhoi District.
Katei ka lympung da ka jingjop kala poi noh sha kaba kut mynta ka sngi hadien ba ki khynnah kynthei bad shynrang naki skul bapher bapher kila ioh ban pyni bad sei madan ïala ki sap ki phong naduh ka sngi ba ar bala plie pyrda ïaka da u Arpit Upadhyaya Deputy Commissioner ka Ri-Bhoi District.
Ïa katei ka lympung ïalehkai sports ki khynnah skul la wan ban pynhap pyrda noh ïaka mynta ka sngi da u Bah Sosthenes Sohtun MLA ka Jirang kum u kongsan bad ka kong Paidolyne L Nonglait DSEO ka Ri-Bhoi kum ka symbud kongsan haka jingdonlang u Bah Bobby L Nongbet District Sports Officer bad kiwei kiwei ki ophisar naka tnad ïalehkai, ki principal, ki nonghikai lem bad ki khynnah skul kiba la wan ban ïashim bynta shitrhem naduh ka sngi ba sdang ryngkat ki paidbah nongpeit kai kiba la wan ban sakhi ha katei ka sngi.
U Bah Sosthenes Sohtun kum u kongsan haba kren ha kane ka sngi u la ai ka jingïaroh iaka ophis jong u District Sports Officer ka Ri-Bhoi bala pynlong ïa katei ka lympung hadien 2 snem bala pynsangeh naka daw ka jingwan lyngshop jong ka khlam Covid-19, bad pynpaw ruh ïaka jing sngewkmen kaba khraw ban iohi ba ki khynnah skul jong ka thaiñ Ri-Bhoi ki don shisha ïaka sap bad ka mynsiem ïalehkai bad thrang ban ioh khur ïaki khunsam na kane ka lympung, haka juh ka por u la pynpaw ruh ka jing sngewkmen ban ïa don bynta lang bad ki khynnah skul ha kane ka sngi kum ka jing ai mynsiem ba kin dang ïalehkai bha bad pyndonkam hok ïaka sap kaba ki don naka bynta ban kiew shaphrang haka kam ïalehkai sports kumba ka Ri-Bhoi District kadei kawei naki district kaba paw haki kam ïalehkai.
U la kyntu ruh ïaki khynnah skul ba ki dei ban nang ïai trei shitom bad ban don ïaka mynsiem ban ïakhun naka bynta ban ioh khur ïaka nam jop ha man la ki jingïalehkai, namar ka kam ïalehkai sports ha kine ki sngi ka dei ruh kum ka lad aikam aijam ïaki samla kiba don shisha ïaka sap haka kam ialehkai.
Naka liang ka ophis u DSO ha katei ka sngi kila sam ruh ïaki khusnam ha kaba ka Best Team haka U-14 ki kynthei la rah da ka St. Johns Secondary School Jyntru, haka liang ki shynrang la rah da ka Little Blossom Secondary School, haka U-16 ki kynthei la rah da ka St. Alfred’s Secondary School, haka liang ki shynrang la rah da ka St. Joseph Higher Secondary School, haka U-18 haka liang ki kynthei bad shynrang la rah da ka St. Paul’s Higher Secondary School Nongpoh kaba long syndon ka lahduh ha katei ka lympung hadien ba kala lah ban khur haduh 12 tylli ki takma ksiar, 4 tylli ki takma rupa bad 12 tylli ki takma rnong
Ki rang bad thei ïalehkai kiba jop na katei ka lympung kin sa leit ruh ban shah hikai ban ïashim bynta haka State Level ka ban sa long shen ha Nongbah Shillong.