Nongstoiñ, Jymmang 13: Ka Sib Singh Memorial Government Higher Secondary School, ka la rah ïa ka nam lahduh (over all Champion) ha ka lympung 27th Inter School Athletic Meet 2022, kaba la pynlong da ka ophis jong ka District Sports Officer West Khasi Hills District Nongstoiñ.
Na ka liang ka Sib Singh HSS ka la rah ïa kane ka lympung mynta u snem da kaba khur 13 tylli ki Gold Medal, 10 tylli ki Silver Medal bad 8 tylli ki Bronze Medal. Katba ïa ka khusnam Best Team la ïoh hi da ka Sib Singh HSS bad ïa ka khusnam ba ar la ïoh da ka St Peters HSS.
Shuh shuh, ïa ka khusnam Best Athletes Under-14 boys, la ïoh da u Ïohborlang Nongrem jong ka Sib Singh HSS, Under-14 girls la ïoh da ka Phibapynsuk Kharjana na ka Anderson HSS. Under-16 boys la ïoh da u Pynshngaiñ Kharbani na ka Sib Singh HSS bad Under-16 girls, la ïoh da ka Wanda Lyngkhoi jong ka Borsing School. Ïa ka khusnam best Athlete jong ki shynrang kiba 18 snem snem shaneng la ïoh da u Mebanïalam L.Mawlieh na Nongstoiñ College bad na ka liang ki kynthei pat la ïoh da ka Tiewlari Riangshiang jong ka Nongstoiñ College.
Ha kane ka lympung ba lai sngi kaba la sdang naduh ka sngi balang, ka la don ka jingpynthut na ka daw ka jingjur slap. Pynban kane ka lympung ka la ïaid beit bad la ïoh ban pynkut noh ha ka por janmiet jong ka sngi thohdieng, ha kaba u MLA Bah Mac Millan Byrsat u la don ryngkat kum u kongsan.
Hynne ka sngi ba pynkut la donlang ruh nalor ki kynrem ki lyndan ba kynthup ïa I DSO Kong Balarina Syiem, ki riew rangbah jong ka thaiñ, ki nonghikai bad ki khynnah skul. Na ka liang I DSO I la pyntip ba ka State Level Inter School Athletic Meet mynta u snem kan long ha nongbah Shillong naduh ka 31 tarik mynta u bnai haduh ka 2 tarik u bnai ban wan.
