Nongpoh, Ïaiong 24: Ka kynhun Shillong Labet kala long ka lahduh haka liang ki kynthei bad shynrang haka lympung ïalehkai Basketball bala tip kum ka 2nd Berchem Cup Basketball Tournament bala pynlong da ka seng samla Nongpoh Proper hadien ka jingïakhun phainal kaba shongshit kaba la long haka sngi Saitjaiñ.
Ïa katei ka lympung la wan ban pynhap pyrda noh da u Bah Jason Sawkmie Mawlong MLA ka Umsning Constituency kum u kongsan, u Pa’iem Wanphrang Syiem Sirdar ka Elaka Nongpoh kum u symbud kongsan haka jingdonlang u Bah Ferdinald Kharkamni President ka KSU North Khasi Hills District, Bah Rayonald Kharkamni Vice Chairman ka Meghalaya Planning Board, ki nongïalam shnong bad kiwei kiwei ki riew rangbah.
Haba phai sha ka jingïakhun phai ka jingïalehkai ba nyngkong kadei hapdeng ka Shillong Labet pyrshah ïaka Tyllilang Academy haka liang ki kynthei ha kaba ka Shillong Labet kala lah ban pynliem noh ïaka Tylli lang Basketball Academy da 54-40 basket.
Haka liang ki shynrang ka jingïakhun kala long hapdeng ka Shillong Labet pyrshah ïaka ONYX Major ha kaba ka Shillong Labet da ka jingtbit ki rangïalehkai kala lah ban pynliem noh ïaka ONYX Major da 62-57 basket ban rah symdon ïaka nam lahduh jong katei ka lympung.
La sam ruh ïaki khusnam ha katei ka sngi ha kaba ka Shillong Labet haka liang ki shynrang kala ioh ban khur ïaka song pisa kaba 50 hajar lem bad ka trophy bad ka ONYX Major kaba la wan baa r kala ioh ban rah ïaka song pisa kaba 20 hajar lem bad ka trophy.
Katba haka liang ki kynthei ka Shillong Labet kala ioh ban khur ïaka song pisa kaba 25 hajar lem bad ka trophy bad ka Tyllilang Basketball Academy kala ioh ban khur ïaka song pisa kaba 10 hajar lem bad ka trophy.
La sam ruh ïaki khusnam bapher bapher ha katei ka sngi ba kynthup ïaka nam Best DisciplineTeam la ioh ban rah naka kynhun kynthei laioh rah daka Splash bad naka kynhun shynrang la ioh rah daka Dulon Basketball Academy, ïaka nam Youngest Player la ioh rah da u Raymond Khongsit na ka kynhun DBA bad I Phibalari Kharmaw naka kynhun Tyllilang, ïaka khusnam MVP la ioh rah da u Henminlam na ka kynhun ONYX Major bad ka Iairi Sangma na ka kynhun Shillong Labet, ïaka khusnam Top scorer pat la ioh rah da u Lal Rem Ruata na ka kynhun Ri-Bhoi Khlawait bad I Yarisha Wahlang na ka kynhun Tyllilang.
