Nongstoiñ, Ïaiong 17: Ka kynhun ïalehkai jong ka Seven Brothers FC ka la rah ïa ka nam kum ka lahduh, ha ka lympung ïalehkai phutbol ha Laitkseh, ïa kaba la tip ruh kum ka CMiv LPFT 2019-2020.
Kane ka nam lahduh sha ka Seven Brothers FC ka la jïa long ha ka jingïalehkai Final ha ka sngi saitjaiñ ha madan Mawkynjoiñ Laitkseh, ha kaba ka la lah ban pynliem ïa ka Ryntih SC da ar kol la nod.
Haba phai sha ka jingïalehkai, ka la long kaba itynnad bad kaba pynhun ïa ki paidbah nongpeitkai kiba la tuid na kylleng ki jaka. Hynrei, ka jinglah jong ka Seven Brothers FC ban thep ïa ka kol ha ka minit kaba 46 lyngba u Khongiong ka la ai mynsiem ïa ka kynhun baroh kawei.
Ïa kane la sakhi ha ka kylla miet ha kaba ka Seven Brothers FC ka la nang ïalehkai khambha shuh shuh bad thep sa ïaka kol kaba ar lyngba u Samson Nongrum ha ka minit kaba 77. Lyngba kine ki ar kol, ka Seven Brothers FC ka la kheit ïa ka jingjop bad rah syndon ruh ïa ka nam lahduh jong kane ka lympung.
Ha kane ka sngi la don lang ruh u bah G.Marbaniang kum u kongsan, u ba la shim ïa ka bynta ban sam ïa ki khusnam bapher bapher. Ki khusnam ha kane ka sngi ki kynthup ïa ka Man of the match kaba la leit sha u Samsom Nongrum, Best Defender sha Dapbor Bareh bad Best Goal Keeper sha u Kenio Lyngkhoi jong ka Seven Brothers FC. Katba ïa ka khusnam Best player of the Tournament la ïoh da u Reson Malngiang jong ka Ryntih SC.
