Rah ka Sawmer SC ïa ka nam lahduh jong ka First Division Football League 2022

Shillong, Jymmang 15: Ka Sawmer SC kala ïoh rah ïa ka nam lahduh jong ka lympung ïalehkai First Division Football League 2022 ba pynïaid da ka Shillong Sports Association (SSA).
Ka Sawmer SC kala pynthikna ïalade ban long ka lahduh hadien ba kala pynliem noh da 2-0 pyrshah ïa ka Lawsohtun SC ha ka jingïakhun ba khatduh jong kane ka lympung ha ka sngi Saitjaiñ ha madan MFA Third Gound, Polo, Shillong.
Ka Sawmer SC kala bat ruh ïa ka kyrdan ba nyngkong ha ka miej kheiñ point da kaba kamai 15 point na ki 6 sien ïakhun bad kan sa ïalehkai ha ka Shillong Premier League (SPL) ha ka samoi ban wan ha ryngkat ka Nongthymmai SC.
Ha ka jingshisha ka Sawmer SC bad ka Nongthymmai SC ki khur mar 15 point, hynrei ka Sawmer SC ka ïoh ban khur ïa ka nam lahduh na ka jingïapher ha ka liang ka thep kol.
Haba phai sha ka jingïakhun hapdeng kine ki ar tylli ki team ha ka sngi Saitjaiñ ka jingïalehka ka long kaba itynnad bad ïakhaid bha ha kaba baroh arliang ki kynhun ki la ïakhun tyngeh khlem da ailad ïa ki jingpyrshang thep kol. Hynrei ka Sawmer SC kaba la don lypa ka jingkyrmen bad kaba donkam beit ban jop khnang ban pynthikna ïalade sha ka kyrdan ba hakhlieh kala ïoh ban pynkhih jar ha ka 8 minit lyngba u Diego A Khyriem.
Lyngba kane ka shi kol ka jingïakhun kala nang ïathnem bha ha baroh arliang ka Lawsohtun SC kala ïakhun tyngeh ban pynphai hynrei haduh ba kut ka kylla step baroh ar ki khlem ïoh thep kol ha kaba ka Sawmer SC kala lamkhmat ïa ka jingïalehkai da 1-0.
Haba wanphai sha ka kylla miet, ka Lawsohtun SC kala sdang ban pynkylla ïa ka rukom ïalehkai bad kala ïoh ruh ban pynsmiej ïa u rangap kol ka Sawmer SC hynrei ka jingbym lah ban pyndep ha ka liang ka thep kol kala ai mynsiem pynban ïa ka Sawmer SC kaba la lah ban teh lakama bha bad pashat bol ha ka rukom kaba itynnad bha.
Ki minit ïalehkai ki la nang ïaid baroh ar tylli ki kynhun ki khlem kynran dien bad tur beit shakhmat da ka thong ban thep kol, hynrei hapdeng ka jingïakhun kaba ïakhaid bha, u Gamelial Kharlyngdoh u la thep ïa ka kola kaba ar na bynta ka Sawmer ha ka minit ba 74 kaba la ai mynsiem shuh shuh ïa ka kynhun kaba la shadkmen. Bad da kine ki ar kol kala nang pynskhem ïa ka kynhun ha kaba kala khur syndon ïa ka nam jop bad rah ïa ka trophy nam lahduh.
Da kane ka nam jop ka Sawmer SC ka la khur ïa ka song pisa kaba 1 lak tyngka ha ryngkat ka trophy katba ka Nongthymmai SC kaba wan ba ar ka ïoh 40 hajar tyngka.
Ha kane ka sngi la wan ban sakhi ruh u Bah Hamletson Dohling Myntri ka tnad pynroi sor ka sorkar jylla, Bah Eugeneson Lyngdoh MLA bad President ka Shillong Sports Association (SSA), ki nongkitkam bad ki paidbah nongkyrshan.
Haba phai sha ki team ka Nongrim Hills SC kan hap ban ïakhun biang ha ka First Division ha ka samoi ban wan bad ka don ha ka kyrdan ba lai na ka miej kheiñ point da kaba khur 13 point.