Nongstoiñ, K’Lyngkot 27 : Na ka bynta ban kyntiew ïa ki khynnah samla ha ka jingïalehkai phutbol ka ki nongïalam jong ka Nonglang Pungsier Sport & Cultural Youth Club ki la pynlong ïa la lynpung ïalehkai phutbol kaba la tip kum ka Republic Day Footbal Tournament 2025 – 26 kaba la sdang naduh u bnai Nohprah jong u snem ba la dep.
Ki nongïalam jong katei ka club ki la pynlong ïa katei ka lympung ïalehkai tang na ka bynta ki khynnah shynrang bad kynthei kiba hapoh khatsaw snem ka karta kiba dei tang napoh ka shnong. Nalor kata ha katei ka lympung la ia shim bynta ruh da ki rangbah napoh ka shnong kiba la sawphew snem sha jrong.
Ki kynhun ïalehkai kiba la ïashim bynta naduh ba sdang ki don shiphew kynhun kata san kynhun ki dei ki khynnah shynrang kiba hapoh khatsaw snem bad san kynhun pat ki dei ki rangbah kiba la sawphew snem sha jrong.
Ha katei ka sngi ba pynkut ïa katei ka lympung ïalehkai phutbol la pynlong ïa ka jingïalang ba lyngkot ha kaba la pynïaid da u bah Pynbiangbor Shylla president ka Club . Ka jingpynkut jong ka Club ïa lympung ïalehkai ha katei ka sngi ka long kum ka jingiasnoh kti lang ha ka jingrakhe ïa ka Republic Day kaba hynñiew phew hynñiew bad ki paitbah nongshong shnong ha ka ri baroh kawei.
Ha katei ka sngi u bah Strongpilar Kharjana Chairman ka Khasi hills Autonomous District Council u la long u kongsan bad u bah D.A.Lyngdoh sordar jong ka shnong Nonglang pat kum u Symbud kongsan.Ha shuwa ban sdang ïa ka jingïalehkai la ïoh ïa ka jingpynshai lyngkot ïa ka jingtrei kam jong ka Club naduh ba la seng ïa ka da u bah Treibor Marweiñ secrtary.
Hadien ka jingpynshai la ïoh ïa ka jingkren lyngkot na u symbud kong san bad khatduh eh la ïoh ïa ka jingkren na u bah Strongpilar Kharjana. U Bah Kharjana haba kren kum u kongsan ha katei ka sngi u la pynshai ba ka Republic day ka dei ka sngi kaba kyrpang tam na ka bynta ki paitbah nong shong shnong hapoh ka ri baroh kawei namar dei ha ka sngi 26 tarik Kyllalyngkot jong u snem 1950 ba la pyntrei kam nyngkong eh ïa ka Riti synshar jong ka ri India hadien ba la dep ban saiñdur ïa ka.
U la ong ruh ba ka Riti synshar jong ka ri India ka dei ka Riti synshar paitbah kaba la pynkup bor ha u paitbah bad u paitbah u don ruh ïa ka hok kaba kyrpang tam kata ban jied ïa ki nongmihkhmat sha ki dorbar thaw aiñ jong ki jylla kiba dei ki MLA bad ki nongmihkhmat sha ka dorbar bah jong ka ri ka Parliament.
U la ong ruh ba ka ri India ka dei ka ri synshar paitbah kaba heh tam ha ka pyrthei bad ym don kano kano ka ri ha ka pyrthei baroh kawei kaba don ïa ka riti synshar kaba da u paitbah ïa u paitbah na ka bynta u paitbah kumba don ha ka Riti synshar jong ka ri India.
Ha katei ka sngi la sdang ïa ka jingïalehkai ban ïaknieh ïa ka nam lahduh da ki ar tylli ki kynhun ïalehkai jong ki rangbah kiba la sawphewsnem shajrong .Ka kynhun ïalehkai jong ki rangbah kiba sawphewsnem sha jrong kiba la poi sha kaba kut ban ïaknieh ïa ka nam lah duh ki dei ka Dong pdeng shnong FT pyrshah ïa ka Byrchanglot FT ha kaba ka dong pdeng shnong ka la rah ïa ka nam lah duh da kaba pyliem ïa ka Byrchanglot FT da ar kol la wei.
Katba na ka liang ki khynnah kiba hapoh khatsaw snem pat ki kynhun kiba la poi sha kaba kut ban ïaknieh ïa ka nam lah duh ki dei ka Sawlad FC pyrshah ïa ka dong pdengshnong FC ha kaba ka Sawlad FC ka la pynliem noh ïa ka dong pdeng shnong FC ha ka Tiebreaker.
Khatduh eh la sam ïa ki khusnam sha ki kynhun ïalehkai ba rem bad ba jop da u kongsan , symbud kongsan bad ki riew rangbah kiba ïadon lang ha katei ka sngi.
