Nongpoh, Naiwieng 14: Hadien shitaiew lynter ba ki samla pule jong ka Balawan College kawei na ki shlem pule kaba la paw ha ka thaiñ Umsning kila rakhe ïa ka taiew lehkmen ba shisien shisnem ne ka Annual Balawanian’s Week halor ka phang Rising with Vision, ki samla pule hapdeng ka jingiphuh iphieng mynta ka 13 tarik Naiwieng kila pynhap pyrda noh ïa katei ka lympung ki samla.
Ïa katei ka lympung la wan ban pynkut bad pynhap pyrda noh da u Ma Lakmen Rymbui myntri ka tnad pule puthi ka jylla, ha ka jingdonlang u Fr Pius Shadap Parish Priest Umsning Parish, u Bah J. Kurbah Principal ka Balawan college Umsning ki nonghikai lem bad ki samla pule.
Na ka liang ki samla pule ha katei ka sngi kila shimbynta ruh ha ki jingshad bad jingrwai bapher bapher bad kumjuh ruh ka jingïakop Miss bad Mr Balawan College kaba la pynshongshit bad pynkhih met ïa ki samla pule katei ka College bad ha katei ka jingïakop ïa ka nam Miss Balawan college la rah da ka samla Pdianghun Mukhim bad ïa ka nam Mr Balawan college la rah da u Samla Augfrintin Kharlakhar.
Haba kren ha kane ka sngi na ka liang u Ma Lakmen Rymbui u la ong ba kane ka pyrthei ka dei kaba eh, hynrei kaba dap kyrhai da ki kabu ksiar lada ki samla ki nang ban pyndonkam ïa ka sap ka jong ki hadien ba kila pyndep ïa ki jingpule ym ban ap tang ha ki kam sorkar, namar kane ka pyrthei kam long shuh kum ha ki por ba mynshuwa, ha kaba ïa ka pyrthei la bynta ha ki ar bynta naduh ba wan ka juk saian, kaba la tip kum ka pyrthei ba shisha bad ka pyrthei kaba ngi lah ban mutdur.
U la ong ruh ba kum ki samla pule nalor ka jingpynlut por ha ki kam klas ki donkam ruh ïa ka por ban lehkmen bad pynpyngad ïa ka jabieng, namar kane ruh ka dei shibynta jong ka pule puthi ban pynkhlaiñ ïa ka jingmut jingpyrkhat bad ban ïatylli kum shipara khamtam ban pynkhuid ïa ka jingmut jingpyrkhat da ka jingkmen.
Kum u myntri sorkar u la sneng bad kyntu ruh ïa ki samla pule ha katei ka sngi ba kin long ki samla kiba ïohi jngai ïa ka lawei, ym ban sahkut tang ha ki jingphohsniew hynrei ban pyndonkam ïa ka jingstad ka jingshemphang ban pynurlong ïa ki jingphohsniew, khamtam ban ieng hala ki jong ki kjat ym ban ap tang ha ki kam sorkar.
