Nongpoh, Ïaiong 10: Ka Samla Balawansuk Makri naka shnong Nongtyrlaw ha Ri-Bhoi District kala ioh rah syndon ïaka nam Miss Ri-Bhoi Tourism 2022 bala pynlong da ka Ri-Bhoi Tourism & Environmental Development Forum haka jingrakhe dap 10 snem jong ka jingïaid lynti ka kynhun naduh bala seng ïaka ha u snem 2012, ha ka jingïalang kaba la long haka sngi Saitjaiñ ha madan NSCA Pahamsyiem napdeng 20 ngut ki nongshim bynta na kylleng ki jaka jong ka dong Ri-Bhoi hadien ba kala lah ban ïaid pynkhih met bha bad jubab ïaki jingkylli jong ki nongbishar.
Ka samla Balawansuk Makri ka dei ruh kaba la pyndep ïaka Graduate haka English honors na Ladykeane College bad ka dei ruh ka nongïalehkai, ka model bad ka dkhot jong ka Bouncer Association of Meghalaya bad ha katei ka jingïakop thei bhabriew ka Samla Jessica Nongrum na Nongpoh kala ioh ban rah ïaka nam 1st Runners up bad ka Samla Deimaphishisha Khongjoh ïaka nam 2nd Runners Up nalor kiwei kiwei.
Kum ban shu pynpaw ba ïa katei ka jingïakop thei bhabriew la pynlong da ka RBTEDF haka sien kaba nyngkong eh kum ka dak ka jingrakhe ïaka jingdap 10 snem jong ka jingïaid lynti jong ka kynhun naduh bala seng ïaka ha u snem 2012 hapoh ka jingïalam jong u Bah Plielad Tiewsoh kum u Chairman da ka jingangnud ban kyntiew bad pynpaw pyrthei ïaki jaka jngohkai pyrthei ha Ri-Bhoi District.
Ha katei ka jingrakhe dap 10 snem ka RBTEDF la wan ruh ban sakhi da u Bah Sosthenes Sohtun MLA ka Jirang kum u kongsan haka jingdonlang u Bah Jason S Mawlong MLA ka Umsning, ka kong Macdalyne S Mawlong MDC ka Umsning, u Bah B Nongkynrih District Tourist Officer, Paiem Wanphrang Syiem Sirdar ka Elaka Nongpoh bad kiwei kiwei ki riew rangbah haka jingdonlang ki nongïalam ka RBTEDF naduh u Bah Plielad Tiewsoh Chairman bad kiwei kiwei bad ha katei ka sngi la ioh ruh ban pynlait ïaka souvenir jong ka kynhun da u MLA ka Jirang.
Haba kren maitphang ha katei ka sngi da ka kong Philarikynti Pde kawei naki dkhot ka RBTEDF kala pynpaw ba katei ka kynhun ka dei kaba trei shitrhem ban pynpaw pyrthei bad kyntiew ïakiba bun ki jaka jngohkai pyrthei ha Ri-Bhoi District, ban pynneh pynsah ïaka mei mariang bad ki sawdong kun, ki jingthaw ba im naduh ki dohkha bad ki mrad ki mreng, ban ai jinghikai sha ki paidbah ban pynneh pynsah bad sumar ïaka mariang khamtam ban kyntiew ïaki kam jngohkai pyrthei haka district lyngba ka jingïatreilang bad ki bor sorkar jong ka tnad jngohkai pyrthei.
Haba kren ha katei ka sngi naka liang u Bah Sosthenes Sohtun MLA ka Jirang u la pynpaw ka jingsngewkmen ban iohi ba katei ka kynhun kala ioh ban rakhe ïaka jingdap 10 snem jong ka jingïaid lynti naduh bala seng ïaka ryngkat shibun ki kam ba kala leh naka bynta ban kyntiew ïaki kam jngohkai pyrthei haka district bad kiwei kiwei ki kam ban pynneh pynsah ïaka mei mariang.
“Nga sngew sarong ban ong ba ka Ri-Bhoi District ka dei kawei naki district kaba u Blei u la kyrkhu haba phai ha baroh ki liang naduh ka riti ka dustur, ka bam ka dih tynrai, ka kup ka sem, ka rep ka riang bad khamtam ka jingdon ki jaka jngohkai pyrthei kaba la khring ïa kiba bun ki nongjngohkai pyrthei na kylleng ki jylla bad kane kadei ka pynpaw ba ka jylla jong ngi kam duna haki kam jngohkai pyrthei kaba lah pat ban kyntiew ïaka ioh ka kot ki paidbah bad ka khajna sha ka sorkar” la ong u Bah Sosthenes da kaba ai jingïaroh ruh ïaka seng RBTEDF kaba la shim ïaki sienjam ban pynlong ki prokram bapher bapher haka district da ka jingangnud ban pynneh ïaka tynrai bad kyntiew ïaka kam jngohkai pyrthei.
La ai jingkren ruh ha katei ka sngi ka u Bah Jason S Mawlong, Macdalyne Mawlong bad kiwei kiwei kiba ai ka jingïaroh ïaka RBTEDF kaba la kynjoh ïa u mawmer ba 10 snem jong ka jingïaid lynti naduh bala seng ïaka ha u snem 2012, ha kaba shibun ki jaka jngohkai pyrthei la lah ban kyntiew ha Ri-Bhoi District hynrei pat nalor ka kam jngohkai pyrthei ngim dei ruh ban klet ïaka tynrai ban pynim ïaka jaitbynriew kaba ki nongwei ki sngewtynnad ban tip bad ban iohi ïaka jinglong kyrpang jong ki Bhoi.
Naka liang ka RBTEF ha katei ka sngi kala sam ruh ïaki khusnam sha ka shnong ba khuid tam ha Ri-Bhoi bala ioh da ka shnong Iamkhon bad ka shnong Saiden ryngkat ruh ki khusnam haka jingmareh marathon bala pynlong haka por mynstepmynstep bad kumjuh ruh ki nongjop haka jingiakop thei bhabriew da ka khusnam pisa.
Shuh shuh ki nongïalam ka RBTEF kila pyntip ruh ba mynta u snem ka kynhun kan sa pynlong ruh ki tamasa bapher bapher kum ka Niangtaser Festival, Pine Apple Festival bad ka Mega Ri-Bhoi Festival bad kiwei kiwei.
La pynphuh pynphieng ruh ha katei ka sngi da ki jingshad bad ki jingrwai bapher bapher bala shim bynta da ki kynhun ba tbit naka them Ri-Bhoi ban pynshongshit ïaki paidbah kiba la poi ban sakhi da ki hajar ngut ha katei ka madan.
