Shillong, Ïaiong 29: Ki thei ialehkai basketball ka Sacred Heart Girls Higher Secondary School, Mawlai Phudmuri haka sngi Thohdieng ka 29 tarik u Iaiong, 2022 ki la iohrah ia ka namlahduh hadien ba ki la lah ban pynliem ia ki thei ka Mawlai Presbyterian HSS, Iewrynghep ha ka Mawlai Inter School Basketball Tournament jong ka Christ Church Morning School, Syllaikariah, kaba la pynlong kum shi bynta jong ka jingrakhe ia ka Jubili Rupa ne dap 25 snem jong kane ka skul step.
Haba phai sha ka jingiakob iakhun Basketball ba la pynlong ha madan jong ka skul Christ Church ki thei ka Sacred Heart Girls HSS ki la pynliem ia ka Mawlai Presbyterian HSS, Iewrynghep da 14 la 3 basketball ha ka final.
Ha kane ka lympung iakhun basketball ka Rofee L. Sohphoh ka la ioh khur ia ka nam Most Valuable Players bad ka skul ha kane ka sngi ka la pynkup burom ruh ia u bah James Kharbamon, uba dei u national referee ka ri.
Ia ka trophy sha ka Sacred Heart Girls HSS kaba dei ka lahduh la sam da u MLA ka Mawlai konstitwensi u Bah Process T Sawkmie kum u kongsan bad sha kaba wan baar ka Mawlai Presbyterian HSS la sam da u headmaster bah B Lyngdoh ha ka jingdon ryngkat ki dkhot ka managing Committee, ka principal jong ka Chirst Church HSS ka kong IG Nengnong, ki nonghikai bad ki khynnah skul.
Ha kane ka lympung iakhun ki don san tylli ki skul kiba shim bynta, nalor ka Sacred Heart Girls HSS bad ka Mawlai Presbyterian HSS, Iewrynghep, ki don ruh ka Nongkwar Bsic School, ka Christ Church Morning School bad ka Christ Church HSS.
Haba ai jingkren u Bah PT Sawkmie u la pynpaw ia ka jingkmen ba u la ioh ban ia don bynta lang ha ka final jong kane ka basketball, kata hadien ar snem ba ki khlem ioh lad shuh ban pynialehkai sports na ka daw ka khlam COVID-19.
