Kuala Lumpur, Naitung 31 : Ka phlim Garo ‘Rapture’ ba la shna da u Dominic Sangma, ka la ïoh rah ïa ka khusnam kum ka Best Cinematography ha ka 7th Malaysia International Film Festival (MIFF), 2024.
ïa kane ka khusnam la leit ban pdiang da u Cinematographer ka phlim u Toxo Xavier, uba la trei kynsai bha ïa ka kam, kaba la wanrah ïa ka nam jong kane ka phlim Garo na Meghalaya, ha satlak ka pyrthei.
Ka 7th Malaysia International Film Festival (MIFF) ka dei kaba la pynlong naduh ka 21 tarik Naituung haduh ka 28 tarik Naitung ha Kuala Lumpur, Malaysia.
Ka ‘Rapture’ ka dei ka phlim hapdeng ki paid Garo ka Meghalaya bad la pynwandur na ka khana jong u khynnah 10 snem uba don ïa ka jingpang ka bym lah ban ïohi haba dum. Une u Khynnah ula im ha ka shnong kaba don hapdeng ka jingsyier naba ka jingïai jah rngai ki briew ha ryngkat ki khana hamsaia ba saphriang halor ka jingdon ki nongrahbor kiba khaïi ïa ki dkhot met ki briew.
Kane ka phlim ka dei kaba la kyrshan da u Hubert Bals, Visions Sud Est, bad ka Doha Film Institute. La pynmih ïa ka da ka Dominic Sangma’s Anna Films ha ryngkat ka jingïatreilang bad ka Xu Jiangshang bad Sun Lun na China, u Anu Rangachar, Harsh Agarwa, Aditya Grover bad Stephen Zacharias kiba dei na India. Ka Eva Gunme R Marak na Meghalaya ruh, kala shim ïa ka bynta kaba kongsan bha ha ka jingpynmih ïa kane ka phlim.
Hadien shisnem ka jingïaid jong ka International Screening, ïa ka phlim ‘Rapture’ yn sa pyllait ha ka sien ba nyngkong eh ha Tura, West Garo Hills ha ka 15 tarik Nailar. Ka jingpyni paidbah ïa kane ka phlim ka dei kaba la apkhmih lynti kaba la slem bha jong ki paidbah ka thaiñ.
