Shillong Jylliew 10: Ka OM Roy Higher Secondary School, Mawlai Kyntonmassar ka la ïohrah ïa ka trophy hadien ba ka la lah ban pynliem ïa ka Christ Church Morning School, Mawlai Sylaikariah da 3-1 ha ka final jong ka VIII Inter School Knock-Out Football Tournament ba la pynïaid da ka FKJGP Mawlai Circle ha madanheh mini stadium, Mawlai Phudmuri ha ka sngi Thohdieng ka 10 tarik u Jylliew, 2022.
Kane ka dei ka sien kaba hynñiew ïa ka OM Roy HSS ba kan iohrah kum ka namlahduh jong kane ka inter skul ba la pynïaid da ka Federation of Khasi Jaintia and Garo People, Mawlai Circle.
Haba phai sha ka jingïakhun ïa ka kol kaba nyngkong la thep da ka u Risjoy Syiemlieh ha ka 23 minit, kol baar da u Bickeystar Warshong ha ka 31 minit bad kaba lai da u Marshansing Lyndem ha ka 43 minit. Katba ka shi kol naka bynta ka Christ Church la thep da u Rochester Lawriniang ha ka 58 minit.
Ha kane ka sngi la sam ruh ïa ki khusnam shimet, ha kaba ïa ka nam top scorer la ioh khur da u Bankerlang Kshiar, ka OM Roy HSS, ba la ioh ban thep 4 kol, ka nam Best Goalkeeper ka la leit sha u Comfort Kharbani (OM Roy), Best Player sha u Risjoy Syiemlieh (OM Roy), ka nam Promising Player ka la leit sha u Daman Babiang Synrem (Mawkhar Christian HSS) bad ïa ka nam Best Discipline Team la ïohrah da ka Mawlai Presbyterian Higher Secondary School.
Ïa ka final ha kane ka sngi la wan ban sakhi lang da u MLA ka thain u Bah PT Sawkmie kum u kongsan, u bah Wellbirth Rani, President ka FKJGP Sengkmie kum u symbud kongsan ha ka jingïadon ryngkatlang u Bah Dundee Cliff Khongsit Working president FKJGP Sengkmie, Bah Eldie N Lyngdoh General Secretary FKJGP Sengkmie, ki nongïalam ka KSU Mawlai Circle bad kiwei de ki CEC member jong ka Seng.
Haba ai jingkren u bah PT Sawkmie u la pynpaw haba kwah ban kiew ha ka ïalehkai football hap ban trei shitom bad ban pyndonkam hok ïa la ka sap ba ki don.
U pynpaw ba u sngewkmen ban ïohi ba ki bun bha ki samla ki la kiew bha ha ka football bad u kyrmen ba kin nangïai kiew bad u ai khublei ruh ia ka FKJGP Mawlai kaba la pynlong ïa kane ka tournament.
Katba na ka liang u bah Welbirth u la ong baka football mynta ka la dei ka profession ym shuh kaba shu ïalehkai bangja ne ïalehkai tynneng bad u la pynpaw ïa ka jingsngewguh ïa ki skul kiba la shim bynta ha kane ka tournament.
Hashuwa kane ka la don ka jingïalekai paralok hapdeng hapdeng ka FKJGP Sengkmie pyrshah ïa ka FKJGP Mawlai Circle bad ka FKJGP Sengkmie ka la ïoh khur ïa ka jingjop.
Ïa ka trophy sha ka Lahduh ka OM Roy la sam da u kongsan bah PT Sawkmie bad sha kaba wan baar ka Christ Church Morning School da u Bah Welbirth Rani.
Ha kane ka lympung ïakhun ki don baroh 14 tylli ki skul kiba wan ban shim bynta kiba kynthup ia Om Roy Higher Secondary School, Kyntonmassar, ka Christian Church SS, Mawlai Syllakariah, ka St. Francis HSS, Kynton-massar, ka Sacred Heart Boys HSS, Mawlai Phudmuri, ka Mawkhar Christian HSS, Mawkhar, Christ Church Morning SS, Syllakariah, ka May Queen SS, Mawlai Nongpdeng, ka Sunray SS, Mawlai Nonglum, St. Alloysius SS, Kyntonmassar bad ka Mawlai Presbyterian HSS, Mawlai Iewrynghep, Jaiaw Presbyterian, 1st MLP Battalion, Mawlai Mawiong Umjapung, nalor ka Pearly Dew bad ka St. Ann.
