Shillong, Jylliew 5: Ka Nongumlong FC ka la ïoh ban rah ïa ka nam lahduh jong ka Inter-Shnong football championship hadien ba ka la lah ban pynslem noh ïa ka Sanmer FC da 2-1 ha ka jingïakhun kaba itynnad bha kaba la poi shaduh ka extra time ha kane ka sngi Saitjaiñ ha madan ïalehkai Madan Ïing Syiem, Mylliem. Ka lahduh ha katei ka lympung ïalehkai ba pynlong da ka Mylliem Youth Congress ka ïoh ban khur ïa ka song pisa kaba 40 hajar tyngka ryngkat ka khusnam katba ka kynhun ba wan Ba-ar ka ïoh ban khur ïa ka song pisa ba 20 hajar tyngka.
Ha katei ka sngi pynhap pyrda ïa ka lympung ïalehkai kaba la wan ban shim bynta haduh 50 tylli ki kynhun na kylleng ki shnong jong ka Mylliem constituency la wan ban sakhi lang ruh da u MP ka Shillong Bah Vincent H Pala ba dei ruh u President ka Meghalaya Pradesh Congress Committee nangta u Working President MPCC Bah PN Syiem kumjuh u Youth President ka Congress samla Adrian nalor u MDC ka thaiñ Bah Ronnie V Lyngdoh, nangta u Rangbah Shnong ka Mylliem bad ruh ki nongïalam ka Mylliem Youth Congress hapoh ka jingïalam u samla Banphira.
Haba phai sha ka jingïalehkai, ka jingïakhun ka long kaba shongshit bha namar baroh arliang ki long kiba mar ïa biang bor bha. Hynrei dei ha shwa ban kut ka jylla step ba ka Sanmer ka ïoh ban lamkhmat shi kol.
Haba poi ka kylla miet ka jingïakhun ka la nang itynnad bad dei ba ki minit kiba jan kut artad ba ka Nongumlong ka la ïoh ban pynïakhaid ïa ka jingïakhun.
Dei tad ynda la poi sha ka extra time ba ka Nongumlong ka la ïoh ban thep ïa ka kol jop hadien ba u rang thep kol jong ka u la shah pynur ha phyllaw kol jong ka Sanmer.
Haba kren ha ka jingïalang shwa ban sdang naduh u MP, kumjuh u Working President MPCC bad ruh u MDC ka thaiñ ki la ong ba kitei ki lympung ym tang ba ki plie lad ïa ki samla ïalehkai na kylleng ka Mylliem ban ïakynduh bad ithuh i thaw hynrei ki plie lad ruh ïa ki ban pyni ïa ka sap kaba ki don.
U Bah Vincent u la ong ruh ba ka Meghalaya baroh kawei ka tip ba ka Youth Congress ha Mylliem kadei kaba khlaiñ tam bad dei ruh ka atiar bad metbah jong ka Youth Congress ha ka jylla.
Ha kane ka sngi la sam ruh ïa ka khusnam rang ïalehkai ba thep bun kol eh u Edilbert Nongshun na Lummawbah, nongap kol ba tbit tam sha u Stephan Kharmyndai na Sanmer FC, rangïalehkai ba tbit tam sha u Mebanaibok Kharbudnah na Sanmer FC bad ka khusnam ba kyrpang sha u Heprit Banshan Thabah ba dang 13 snem na Syllai-u-lor FC.
La pynkup burom kyrpang ruh ïa ka Mylliem Sports Club kaba la rung sha ka First Division bad ruh ïa ka Sawmer Sports Club kaba rung sha ka Super Division.
