Shillong, Nohprah 13: Ka Nongkseh SC ka la pynkut ïa ka aïom lehkai jong u snem 2025 kum ka lahduh ha ka SSA Champions Cup hadien ba ka la lah ban pynliem ïa ka Shillong Lajong FC da 2-1 ha ka jingïakhun phainal ha madan First Ground-SSA Stadium, Polo.
Lah ban kdew ba ka jingïakhun ka la long hapdeng ar tylli ki klob kiba ïapher bha ha ka rukom treikam; kawei kaba la ïohmad bun tylli ki snem jong ka jingjop, katba kawei pat kaba dang wan ban ïa aireng pyrshah ïa ki kynhun ba kynsai tam; baroh ar kim pat shym la shah rem ha baroh kawei ka samoi; ka kol hapoh 30 minit jong ka Lajong bad nangta ka jingwanphai biang ym tang kawei hynrei ar tylli ki kol ha ki khyllipmat ba khatduh: ka kol pynïakhaid ha ka kylla miet bad ka kol pynjop ha kaba kut jong ka por pynjlan (extra time) ka la rai ïa ka Nongkseh kum ka lahduh.
Baroh arliang mamla ki la ïoh ïa ka jingkyrshan kaba paka, ha kaba katkum ka jingkheiñ ba la phah ki la don kumba 10,000-12,000 ngut ki nongkyrshan kiba la wan sakhi ïa kane ka final, hynrei dei ki nongkyrshan ka Nongkseh kiba la ïoh ban shad kmen ha kaba kut jong ka jingïakhun.
Haba phai sha ka jingïalehkai, ka Lajong ka la paw kumba ka lah bam lyndet ïa ka rukom lehkai jong ka Nongkseh ha ka kylla step– ka jinglah jong ka ban khmih lynti ïa kaei ka ban jia ka long kaba ym lah ban ïanujor ha kaba ki nongïalehkai ka Lajong ki la lah ban tip lypa la jan man la ki khep ïa ka jingthmu jong ki nongïalehkai liang pyrshah.
Ka Lajong ka la ïoh ba kan lamkhmat ïa ka jingïalehkai lyngba ka kol u Babysunday Marngar (27′), kaba la thep hadien ka jingbakla jong u Banpynkhrawnam Nongkhlaw, uba la pyrshang ban pynlait ïa ka bol na ka jingma hynrei ka la bol ka la poi ha ki kjat jong u Baby.
Kaba la pynkylla ïa kiei kiei ha ka jingïalehkai ka dei ka jingpynrung ïa u Shano Tariang ha ka kylla miet da u coach Bah Richard Nongneng. Ka jingdon jong u ka la pynlah ïa ka Nongkseh ban tehlakam ïa ka jingïalehkai hapdeng madan (midfield) bad ka la pynïoh shibun ki kabu ban pyrshang sha kol. Hynrei ka jingtbit jong u Wanteilang Malngiang ka la pynneh pynsah ïa ka kol lamkhmat jong ka Lajong, ha kaba u ne u nongap kol u la kyntait ym duna ïa ka lai tylli ki kabu ba thikna ban khanglad ïa ka Nongkseh.
Ka SLFC ka la ïaleh katba lah ban pynsyrwa kai ïa ka por da kaba pynbunkam ïa ki physio ban wan sumar ïa la ki jong ki nongïalehkai ha madan. Kane ka la pynlong ïa ki nongpynïaid ban pynjlan ïa ka por sa 8 minit. Dei hapdeng kane ka por ba u Kynsaibor Lhuid (90’+4) u la pynïakhaid ban rah ïa ka jingïakhun sha ka extra time.
Ka SLFC ka la ïalehkai pyndep ïa ka extra time da tang 10 ngut ha madan hadien ba u Samchaphrang Lato u la ïohpdiang ïa ka yellow card kaba ar. Katba ka extra time ka la jan kut artad u Hardy Cliff Nongbri (120′) u la ïoh ban thep ïa ka namtam bad buh hakhmat ïa ka Nongkseh.
Mynta ka la dei ka por jong ka Nongkseh ban pynsyrwa kai ïa ka por ha kaba u Hardy u la mynsaw bad donkam ban shah sumar bad hadien katto katne minit u referee u la pynsawa ïa ka jingsawa ba khatduh. Da kane ka resol, ka jingïalehkai khlem shah rem jong ka Lajong ha ki 16 tylli ki jingïalehkai ka la kut noh, katba ka Nongkseh ka la pynjlan ïa la ka jong ka rekod sha ka 15 sien ha ki lympung ïalehkai ka SSA mynta ka samoi.
U Myntri ka tnad ïalehkai ka Sorkar Jylla Bah Wailadmiki Shylla u la long kum u kongsan ban ïadon lang ha ka jingïalang sam khusnam, ha kaba u Kynsaibor u la khur ïa ka ‘Hello Meghalaya Player of The Final’. Ki la don lai ngut ki ‘Top Scorer’ bad u Riborlang L Lyngkhoi (6 kol) ka Lajong u dei tang ma u uba la don lang ban pdiang ïa ka khusnam jong u. U Donlad Diengdoh (Langsning) bad u Pynshailang Lyngkhoi (Meghalaya Police) ki dei kiwei pat kiba la thep mar 6 kol.
Kum ka lahduh, ka Nongkseh ka la ïoh ïa ka trophy kaba itynnad bha bad ka khusnam pisa kaba T.8 lak, katba ka SLFC ka la ïoh pdiang T.4 lak kum ka Runners Up. Kane ka pynlong ïa ka Champions Cup kawei na ki lympung phutbol kaba ai heh ka khusnam ha ka liang ka pisa ha ka jylla baroh kawei.
ïa kane ka lympung ba thymmai la pynlong da ka Shillong Sports Association, kaba la pynïasoh lang ïa ki lahduh bad kiba wan ba ar (runners up) na ki san tylli ki Division jong u snem 2025.
