Nongstoiñ, Ïaïong 04: Ka Hill State People Democratic Party ka la pynlong ïa ka tamasa phutbol kum ka dak jong ka jingkynmaw burom ïa u (L) bah Hopingstone Lyngdoh kum u riew khraw jong ka jaitbynriew u ba dei ruh u nongseng jong ka party, u nongïalam ba radbah ha ka jingïakhih ban dawa ïa ka jylla ba pura haduh ban da ïoh ïa ka.
Kane ka lympung phutbol ka dei kaba la pynlong da ka Nginïong Primary unit. Ïa katei ka tamasa phutbol la sdang naduh ka 23 tarik Kyllalyngkot 2022 bad ki la don kumba 22 tylli ki kynhun ïalehkai na ki club bapher bapher na ka thaiñ. Hynrei ki kynhun kiba la poi shaduh kaba kut ban ïaknieh ïa ka nam lah duh ki dei ka Nginïong SC pyrshah ïa ka Phudumbahsepngi SC.
Ha kaba sdang jong ka kylla step ha ka minit kaba 16 ka Nginïong SC ka la ïoh ban pynkhih nyngkong ïa kajar. Tang mar shu khih ka jar ki rangïalehkai ka Phudumbahsepngi ki la pyrshang ban pynkylla ïa ka rukom ïalehkai, hynrei ki rangïalehkai ka Nginïong SC kim ailad satia ba kin pynphai kylla. Kumta haduh ba kut jongka kylla step ka Phudumbah SC kam shym la ïoh lad satia ban pynphai ïa ka shi kol.
Ha ka kylla miet ka la sdang ka jingïaleh ka la kham shongshit shuh shuh namar baroh tylli ki kynhun ki la ïakhun dohïap ban pynkhih jar biang. Hynrei ka jingpyrshang jong ki kam shym la sei soh, kumta haduh kaba kut jong ka kylla miet ym shym don shuh ba ïoh thep kol. Kumta ka Nginïong SC ka la lah ban pynliem ïa ka Phudumbah SC da shi kol la nod bad ka la ïoh ban rah ïa ka nam lah duh ha katei ka lynpung ïalehkai.
