Nongstoiñ, Risaw 27: Ka New Nongstoiñ Sports Club bad Dilingim Sport Club ki la rah ïa ka nam kum ki lahduh ha ka lympung 1st MLA Cup Football Tournament kaba la long ha madan New Nongstoiñ.
Kane ka lympung kaba nyngkong eh ba la pynïaid da ka MLA Cup Football Tournament Committee, ka dei kaba la pynlong naduh kine ki taiew kiba la dep ha kaba ki kynhun bapher bapher ki la ïashimbynta.
Hynne ka 27 tarik u Risaw 2025, la pynkut noh lyngba ki jingïalehkai phainal ha kaba na ka liang ki kynthei kiba ïalehkai ha ka madan Futsal, ka Dilingim ka la pynliem ïa ka Mawkhlam da shi kol la nod. Katba na ka liang ki shynrang ka New Nongstoiñ ka la pynliem ïa ka Mawkaton da ar kol la nod ha madan New Nongstoiñ.
U kongsan u ba la donlang ha kane ka lympung dei u Bah Prestone Tyngsong Deputy Chief Minister ha ryngkat u local MLA Bah Gabriel Wahlang, Bah Gigur Myrtong, Bah N.Nongdkhar, Bah H.M Shangpliang bad kiwei kiwei de ki kynrem ki lyndan.
Hadien ba la kut ka jingïalehkai phainal jong ki shynrang, la sam ïa ki khusnam sha ki rang bad thei ïalehkai kiba pawnam tam jong ka lympung. Kumjuh ruh la sam ïa ki khusnam pisa ryngkat ki trophy sha ki kynhun lahduh bad kiba la wan ha ka kyrdan kaba ar.
Na ka liang ka Committee ka la pynbna ruh ban ïai bteng ïa kane ka lympung na uwei u snem sha uwei pat, kum shibynta bann kyntiew ïa ka sap ka phong jong ki samla ha ka District baroh kawei.
