Shillong, Nailar 17: Ka Mawkasiang SC ka la rah ïa ka nam lahduh jong ka U-20 Fourth Division (U-20) Football League 2025 jong ka Shillong Sports Association hadien ba ka la pynliem noh ïa ka Mawlynrei SC da 3-1 ha ka penalty shootout ha ka jingïakhun final ha madan First Ground-SSA Stadium, Polo, ha ka 16 tarik Nailar jong ka sngi Saitjaiñ.
Ka jingïakhun haduh kaba kut jong ka por ba la mang hapdeng kine ki arliang mamla ka la ïakhaid da mar 2-2 kol bad ym shym la don ba pynkhihjar satia ha ka extra time kaba la pynbor ïa ka rai ban jam sha ka tie breaker lane ka penalty shootout.
Wat hadien kane ka jingïakhun kaba itynnat bad kaba ïaryngkat bor hynrei ka tiebreaker ka la long kaba noh shiliang namar ba ka Mawlynrei kam shym la lah ban thep ïa ki lai tylli ki penalty jong ka, katba ka Mawkasiang ka la ïoh ban thep baroh lai tylli kiba ka la shut.
Baroh ar tylli ki kynhun ki la ïoh ban lamkhmat markylliang ha kane ka jingïalehkai, ha kaba ka Mawkasiang ka la pynkhihjar nyngkong lyngba u Melbert Kharbangar (4’min) tang mar ïa sdang. Hynrei ka Mawlynrei ka la trei shitom ban thaw ïa bun tylli ki lad ki kabu bad ha kaba khatduh ka jingminot ka la seisoh lyngba u Banrap Dohling (24’) ban pynkut ïa ka kylla step da mar 1-1 kol.
Nangta ha ka kylla miet ka jingma ka la wan ha ka Mawkasiang hadien ba uwei u rangïalehkai jong ka kynhun u la shah beh noh namar ka red card, kaba la pynlong ïa ka Mawkasiang ban ïakhun tang da ki 10 ngut. Ka Mawlynrei ka la pyndonkam ïa kane kum ka kabu ban synshar ïa ka jingïakhun bad pynkhih ïa ka kol lamkhmat ha ka minit kaba 51 lyngba u Elvinson.
Ka Mawlynrei ka la ap sa tang katto katne minit ban lehkmen shuwa ba ka free kick kaba itynnat jong u Hame-dao Nongtdu (80’+1) kan pynpulom ïa ka jingap khmihlynti jong ka liang pyrshah bad pynïakhaid ïa ka final ha ki minit pynjlan jong ka por shuwa ban kut, bad kaba la ai mynsiem lehse ïa ka Mawkasiang ban jop ha ka penalty shootout.
Kum ka lahduh, ka Mawkasiang ka la ïohpdiang ïa ka khusnam pisa kaba T.60,000 ryngkat ka trophy, katba ka Mawlynrei ka la ïohpdiang ïa ka khusnam pisa kaba T.30,000 kum ka kynhun ba wan ba ar.
La ïoh ruh ban sam ïa ki khusnam shimet sha ki rangïalehkai ba kynsai, ha kaba u Farbious Marbaniang u la khur ïa ka nam ‘Player of the Final’ hadien ba u la khanglad ar tylli ki penalty ha ka tiebreaker. U Phasdonlang Hynniewta uba la thep 9 kol jong ka Mawphlang SC u la ïoh ïa ka nam Top Scorer.
Kiba la don ryngkat ha ka jingsam ïa ki khusnam ki kynthup ïa ki nongïalam jong ka SSA bad ka seng kmie ka Meghalaya Football Association, ba la ïalam da u bah Banteidor Lyngdoh bad u bah Hamletson Dohling kiba long ki President jong ki ar tylli ki synjuk.
Kumban shu pynkynmaw, ka Mawkasiang SC bad ka Mawlynrei SC, ryngkat bad ar tylli ki kynhun kiba la shah rem ha ka semifinal, ba kynthup ïa ka Lummawbah bad ka Lapalang, kin shah kyntiew kyrdan sha ka lympung ïalehkai SSA Third Division ha u snem ban wan.
