Shillong, Risaw 20: Ka Langsning ka la kylla long ka lahduh jong ka Shillong Premier League 2025 hadien ba ka Mawlai ka la ïakhaid noh da mar 1-1 kol bad ka Rangdajied United ha ka jingïalehkai kaba khatduh jong kane ka samoi, kaba la long ha ka janmiet jong ka Lah sngi U Blei.
Ka Langsning ka la pyndep ïa ka jingïalehkai kaba khatduh jong ka ha ka 14 tarik Risaw bad ki la hap ban ap ym tang kawei hynrei ar tylli ki jingïalehkai ban ïoh ïa ka resol kaba thikna – ka Shillong Lajong ka la ïakhaid khlem kol bad ka Nangkiew Irat (0-0) ha ka sngi Saitjaiñ bad ha ka Lah sngi U Blei ka Mawlai kam shym la lah ban pynliem ïa ka Rangdajied. Ki rangïalehkai ka Langsning kin hap ban ap khyndiat por shuwa ban ïoh bat ïa ka khusnam lahduh ha kti, ha kaba ka jingsam khusnam kan sa jia ha ki sngi ban wan.
Lah ban ong ba ka jingkyrmen ka long pyrshah ïa ki, hynrei ka jinghiar poiñ jong ka Lajong bad ka Mawlai haki jingïalehkai ba khatduh jong ki ka la pynurlong ïa ka jingangnud jong ka Langsning, ha kaba kane ka kynhun ka la pynkut ïa ka SPL 2025 da kaba kamai 20 poiñ, bud sa ka Lajong ha ka kyrdan ba-ar da kaba kamai 19 poiñ bad ka Mawlai ka la wan ba lai, kumjuh da 19 poiñ. Kane kadei ka khusnam lahduh kaba lai na ka bynta ka Langsning ha ka SPL, hadien ba ki la rah mynshwa ar sien lynter ïa ka burom lahduh ha u snem 2017 bad 2018.
Ka la long ruh ka jingkylla kaba khraw lada phaidien bad bishar ïa ka aïom ïalehkai kaba duna ba ki la wan kyrdan ba hynriew ha ka SPL 2024. U coach u Khlain Pyrkhat Syiemlieh u la pynneh pynsah ïa ki katto katne ki rangïalehkai ba kongsan, kum u Dajiedlang Wanshnong, Rajat Paul Lyngdoh, Chusrang Sangma bad u Manbhalang Nongmin, bad pynkhlaiñ ïa ka kynhun da kaba soi ïa ki rangïalehkai ba kynsai, kum u nongthep kol ba bun tam jong ka klob u Donlad Diengdoh, Apborlang Kurbah bad katto katne ki rangïalehkai ba dang samla kum u Samuel Phawa bad u Wanshwadame Diengdoh.
Ka la shim khyndiat por ïa kane ka kynhun kaba thymmai jong ka Langsning ba kan lah ban ïalehkai bha. Watla ki ju sahdien jan baroh kawei ka samoi hadien ka Nangkiew Irat, Lajong bad Mawlai hynrei ha kaba kut dei ma ki kiba pyndep ha khlieh duh jong ka miej. Ki la jop tang kawei na ki lai tylli ki jingïalehkai ba nyngkong jong kane ka samoi hynrei ki la pyndep ha ka rukom kaba khlaiñ da kaba jop saw sien lynter ha ki jingïakhun kiba bud.
Ka jingïakhun hynne ka sngi la ïohi ïa ka Mawlai kaba la lamkhmat ha ka minit kaba 50 lyngba u Ricky Chyne hynrei ka RUFC ka la pynïakhaid noh ha ka minit kaba 58 lyngba u Pasborlang Khonglikong.
Kumta ki kynhun kiba la pyndep ha ka thup kyrdan Top 6 ha ka SPL 2025 ba kynthup ïa ka – Langsning, Lajong, Mawlai, Nangkiew Irat, Rangdajied bad ka Sawmer – ki la pynthikna ïa ka jaka jong ki ha ka Shillong Super Cup kaba thymmai. Ka Langsning kum ka lahduh bad ka Lajong kaba wan ba ar (runners-up) kin rung beit beit sha ka semifinal, katba ki saw tylli kiwei pat kin ïakhun shuwa ha ka playoff. ïa ki jingtip ba bñiah halor kane yn sa pynbna shen da ka Shillong Sports Association.
