Rah ka Kynton Massar ïa ka nam lahduh ha ka Mawlai Games na ki 24 tylli ki shnong

Shillong, K’Lyngkot 11 : Ka Kynton Massar ka long ka shnong kaba la rah ïa ka nam Lahduh ha ka Mawlai Games & Literary Fest 2026 hadien ba ka la ïoh haduh 45 tylli ki takma kiba kynthup ïa 19 tylli ki takma ksiar, 12 tylli ki takma rupa bad 14 tylli ki takma rnong.
Lah ban kdew ba ka Mawlai Games & Literary Fest 2026 ka la sdang naduh ka 3 tarik u Kyllalyngkot 2026 bad kut noh ha ka 10 tarik u Kyllalyngkot da ka jingpynhap pyrda kaba iphuh iphieng ha Basketball Court jong ka Mawlai Nonglum.
La ïadonlang ha kane ka sngi da u MLA ka Mawlai, u Bah Brightstarwell Marbaniang kum u Kongsan, u MDC Bah Eddieson Kharumnuid kum u Symbud Kongsan, ka Dr.L Myrthong, Additional Project Director ka MACS, u Bah Hering Shangpliang, Professional Coach, ki Rangbah Shnong ka Shnong Mawlai, ki Seng Longkmie, ki Seng Samla Shnong, ki nongshah khot sngewbha lem bad kiwei kiwei.
Ha kane ka sngi la pynsam ïa bun ki khusnam kiba kynthup naduh ka Shnong kaba wan ba ar kaba ba la ïoh da ka Mawdatbaki, ka Best Discipline ba la ïoh da ka Nonglum lem bad ki khusnam Rang bad Thei Kynsai ha ki jingïalehkai bapher bapher.
Ha ka khusnam jong ki Rang bad Thei ïalehkai ba kynsai ha kane ka MG&LF 2026 ki long ka samla Bandarika Kharkongor na Umshing bad u samla Pyrkhat Mylliem Umlong na Umthlong kiba la ïoh ïa ka khusnam Over The Top ha ka Arm Wrestling, u samla Bashem Kurkalang na Syllaikariah uba la ïoh ïa ka khusnam Best Player ha ka Football, ka samla Badarilin Massar na Mawdatbaki bad u samla Kumbamang L. Nonglait na Iewrynghep kiba la ïoh ïa ka khusnam Best Player ha ka Basketball, ka Samla Dolcy E. Diengdoh na Umjaiur bad u samla Damonlang Marbaniang na Iewryngehep kiba la ïoh ïa ka khusnam Best Boxer.
Ha ka Athletics, kiba ïoh ïa ka khusnam Best Athlete ki long i Heprit Ilaphinia Tron na Umjajew bad i Mesapyniaid Jana na Nonglum ha ka Under-14, ka samla Ibalakordor Tron na Umjajew bad u samla Teibok Snaitang na Kynton Massar ha ka Under-16, ka Samla Laphinia Majaw na Umjajew bad u samla George Everstar Wahlang na Mawkynroh ha ka Under-18 bad ka samla Claire Jones Jala Kharbhih bad u Samla Farell C. Kapulare na Nongkwar na Nongkwar.
Ha kane ka sngi nalor ki jingkren na u Kongsan, symbud kongsan bad na kiwei kiwei, la pynsngew ruh ïa ka kaiphod kaba ïadei bad baroh ki kam kiba ïadei bad ka Mawlai Games & Literary Fest kynthup ruh ïa ki jingïoh ïa ki synniang bapher bapher lem bad ki jinglut jingsep baroh ha kane ka lympung ïalehkai ba la pynsngew da u Bah Baiaineh Kharumlong, Treasurer ka MG&LF.

Kyrteng Shnong Gold Silver Bronze Total
1 Kynton Massar 19 12 14 45
2 Mawdatbaki 11 18 10 39
3 Mawiong-Umjapung 9 11 10 30
4 Umthlong 9 2 2 13
5 Umjajew 8 9 7 24
6 Umsaw 7 4 5 16
7 Iewrynghep 7 1 5 13
8 Nonglum 6 9 18 33
9 Phudmuri 6 4 4 14
10 Mawkynroh 6 4 3 13
11 Mawtawar 4 6 – 10
12 Mawroh 4 5 2 11
13 Nongkwar 3 2 2 7
14 Umjaiur 3 13 6 22
15 Motsyiar 1 1 3 5
16 Syllaikariah 1 – – 1
17 Umshing 1 – – 1
18 Nongpdeng – 1 1 2
19 Nongkohlew – – 2 2
20 Umrynjah – – 1 1
21 Mawïong rim – – 1 1
22 Madan Mawkhar – – – –
23 Mawsiatkhnam – – – –
24 Umphrew – – – –