Jowai, Ïaïong 05: Ka Kemidon FC kala pynliem noh ïaka Border Line FC da 5-4 daka jingïashut Tie-breaker hadien bala ïakhaid ka jingïalehkai da 0-0, naka bynta ban khur ïa ka namlahduh haka lympung ïalehkai jong ka 12th Secondary School Football Knock-out Tournament 2025-26.
Ha kane ka jingïakhun Final kaba la long ha ka sngi Saitjain,la wan ban pynhap pyrda da u bah Lahkmen Rymbui Myntri sorkar u ba dei ruh u MLA ka thaiñ, u bah Medling Swer MDC ka thaiñ, u bah Khroobok Passah DSO West Jaiñtia Hills, u bah Phrangki Pale Project Engineer State Sports Council, u Dalloi Elaka Satpator ryngkat ki riew paw khmat ka thaiñ bad ruh ki nongkitkam naki synjuk ïalehkai ba pher ba pher jong ka thaiñ.
Hashwa ban sdang ïa ka jingïalehkai u bah Lahkmen Rymbui MLA ka thaiñ u la ïoh ruh ban buh ïa u maw nongrim naka bynta ban tei pyn bha pynmiat ïa ka madan kaba kynthup naduh ki jaka shong peit kai kaba tap da ka tnum ka jingshna kynroh bad kiwei kiwei. Ïakane ka jingshna pynbha ïa u madan la mang tyngka haka jinglut kaba 1.83 klur tyngka.
La ïoh ruh ban sam ïa ki khusnam shimet sha ki rang ïalehkai ba kynthup ïa ka nam Man of the match ba la ïoh da u Primrose Lamat naka Border Line FC bad ïa ka nam Best Goalkeeper la ïoh ban rah da u Wanbor Jungai naka Kemidon FC. Lyngba kane ka jingjop ka Kemidon FC kala ïoh ïa ka song pisa kaba 3 lak shiteng, katba ka Border Line FC kala ïoh 2 lak shiteng ryngkat ki Trophy.
