Shillong, ïaïong 05: Ka kynhun ïalehkai jong ka Friends United ka la ïohrah ïa ka nam lahduh jong ka lympung 5th District League T20 Cricket Tournament 2026 ba la pynïaid da ka East Khasi Hills Cricket Association (EKHCA) hadien ba ka la jop ïa ka jingïakhun phainal ha ka sngi Saitjaiñ.
Ka khusnam lahduh kam shym la wan da kaba suk na ka bynta ka Friends United, ha kaba ka kynhun ka la pynskhem ïa ka jingjop da tang 1 wiket pyrshah ïa ka Cricket Smit ha ka jingïakhun phainal kaba ïakhaid bad kaba jur bha ha madan Saitsohpen, Sohra.
Namar u slap ïa kane ka jingïalehkai la pynduna noh sha ka 18 ober. Hadien ba jop ïa ka jingkynting pisa (toss) ka Friends United ka la kam trai ban bol nyngkong, ha kaba ka la weng noh ïa baroh 10 ngut ki nongtied jong ka Cricket Smit tang na ka bynta 72 ron haki 16.1 ober. U Nikodomas Lyngdoh u la noh synñiang 25 ron naki 22 bol; ha kawei pat ka liang u Bryan Macmillan Marbaniang u la ïoh ban khur 4/9 haki 3.1 ober ha ka boling.
Ka Friends United ka la pyndep ïa ka kamram ha ka ober ba khatduh, da kaba kynjoh 75 ron haki 17.5 ober bad khyllem 9 wiket. U Precious Nongrud u la noh synñiang 25 ron naki 39 bol. Watla na ka liang jong u Pynkhrawbok Thabah (4/8 haki 4 ober) u la lehkai bha ha ka boling hynrei ka kynhun kam shym la lah satia ban khanglad ïa ka liang pyrshah.
U Precious Nongrud uba la khur 1/9 haki 3 ober ha ka boling bad kamai 25 ron naki 39 bol ha ka por tied, u la pynkut ïa ka phainal ryngkat ka khusnam Player of the Match, katba u Bryan Macmillan Marbaniang u la shah jied kum u Player of the Tournament.
Kum ka lahduh ka Friends United ka la ïohpdiang ïa ka khusnam pisa kaba 40000, katba ka Cricket Smit ka la ïohpdiang ïa ka khusnam pisa kaba 20000 kum ka kynhun kaba wan ha ka kyrdan ba ar.
Ha kane ka phainal jong kane ka lympung la wan kongsan da u President ka MCA u James PK Sangma ha ryngkat ka jingdonlang u bah D. Kynta – Sirdar Elaka Saitsohpen, u bah Evan Maxwell Basaiawmoit – President ka Sohra Sports Association, ki dkhot ka Seng Samla Saitsohpen, Synjuk kynthei Saitsohpen bad ki nongkitkam jong ka East Khasi Hills Cricket Association.
