Rah ka CPA bad ka Mawkyrwat Pres. SS ha ka prokram ‘Jan Bhagidari Events & Activities in School’ ha Mawkyrwat

Mawkyrwat, Jylliew 12: Ka ophis jong u District Mission Co-ordinator, SSA, South West Khasi Hills District mynta ka sngi ka la pynlong ïa ka ‘Jan Bhagidari Events bad Activities in School’ halor ki lai tylli ki phang kaba la pynlong na ka bynta ki khynnah skul bad kumjuh ruh ïa ki nonghikai ha kaba la pynlong ha ka hall jong ka Maharam Government Higher Secondary School, Mawkyrwat bad u bah T. Lyngwa, IAS, Deputy Commissioner, South West Khasi Hills District u la long u kongsan.
Ki lai tylli ki phang ba ki khynnah skul bad ki nonghikai ki la ïoh ban ïa shimbynta shit rhem ki long ka ‘Story Telling’, ‘Arts and Craft Competition’ bad ‘Teacher Learning Material’ (TLM) Exhibition Competition ha kaba ka thong ba kongsan eh jong kane ka program ka long ban pynshlur ïa ki khynnah skul ba kin sei bad pynpaw ïa la ki sap ki phong ba ki ki don ym tang hapoh ki skul ba ki ki pule hynrei wat shabar lada don ki prokram jong ki jingïakop bad ba ki nonghikai ha ki skul ki dei kita ki nongaibuid.
Haba kren ha ka jingïalang u bah T. Lyngwa, IAS, Deputy Commissioner, South West Khasi Hills District u la pynpaw ka jingaikhublei ba kyrpang na ka bynta ki khynnah skul kiba la ïoh ban pynpaw paidbah ïa kita sap ki phong ba ki ki don wat hapdeng ki jingïakop ha ki bynta bapher bapher. U la ong ruh ba da ka jinglah jong ki ban pyni ïa ki sap bad ki jinglah jong ki ha kane ka jingïakop ka la long pynban ka jingaimynsiem na ka bynta ki nonghikai bad ki bor ba dei peit jong ki skul da kaba kin ïai pynlong ïa kum kine ki jaid jingïakop bad da kata lah ban ithuh hangno ki khynnah ki don ka sap.
Kumta u la ai mynsiem ïa ki khynnah skul ba kin long borabor kiba trei shitom ruh ha ki jingpule namar ka jingpule ka long kawei ka lynti ban pynpoi ïa ki khynnah sha ki kyrdan kiba kham hajrong bad ba ki dei ruh ban long ki khynnah kiba trei shitom bad aiti lut ha ka jingpule ryngkat ka jingkut jingmut kumba ki la pyni ïa ka sap bad ka jinglah ha kine ki prokram ba la pyndep mynta sngi.
Haba kren pat ha ka liang ka jingsumar sukher ïa ka mei mariang, u bah Lyngwa u la ai jingmut ba kum ki khynnah skul ki dei ban ai lem ki jingtip ha ki kmie ki kpa halor ka jingpyndonkam ïa ka plastik namar ka jingpyndonkam ïa ka ka la long shaba palat bad katba shaba phai ki lynti ki synkien ki la dap sa tang ki jaboh jong ki plastik bad namarkata, kum ki briew haba ki leit donkam ha ki jaka ïew ban thied jingthied ki dei ban kynmaw ban da rah hi noh da ka plastik ba ki la khreh lypa na ïing.
Ha kane ka sngi la ïoh ruh ïa ka jingïathuh khana lyngkot ne ka Story Telling na ka Miss Joyfullin Lyngdoh bad na u Jeson bad pynbud da ka jingsam ïa ki khusnam sha ki nongjop ha ka Arts & Craft Competition kata ka Bansasiewdor Nongsiej jong ka Christian Principle’s Academy Secondary School, Mawkyrwat ha ka kyrdan ba nyngkong, u Dashanskhem Lyngkhoi na ka Rodphod Upper Primary School, Nongnah ha kaba ar bad ka Ewanphibanbet Wanniang na ka Maharam Government Higher Secondary School, Mawkyrwat ha ka kyrdan ba lai.
Nangta, ki nongjop ha ka Teaching Learning Material (TLM) Exhibition Competition ki long ba nyngkong dei na ka Mawkyrwat Presbyterian Secondary School, ba ar na ka Christian Principle’s Academy Secondary School bad ba lai na ka St. Thomas RC Upper Primary School.
Lah ban kdew ba kiba la wan ïashimbynta ha kane ka ‘Jan Bhagidari Events bad Activities in School’ ki don baroh 14 tylli ki skul bad 10 ngut pat kiba ïa shimbynta ha ki jingïakop.
Kiba la ïadonlang ha kane ka sngi ki long ka kong A. Dkhar, Functional Manager jong ka DCIC, u bah Staising Kharbteng, Sub-Inspector of Schools, ki khynnah skul bad ki nonghikai skul.
Ka kong S. Kharsahnoh, District School Education Officer (DSEO) bad In-charge Sub Divisional School Education Officer (SDSEO) ka la ai ki kyntien pdiang sngewbha, bad u Staising Khartbteng, Sub-Inspector of Schools u la ai ki kyntien khublei.