Shillong, Naiwieng 18: Ka Combine 12 FC kaba na Mawlai Mawïong ka la lah ban pynliem ïa ka Second Chance FC kaba na Mawlai Motsyiar da 1-0 ha ka jingïalehkai final ban rah syndon ïa ka namlahduh jong ka Mawlai Futsal League ba la pynïaid da ka Samkhamti ha madan Hellick Lina Mini Stadium, Mawlai Mawdatbaki ha ka sngi Saitjain kaba hap ha ka16 tarik u Naiwieng, 2024.
Lyngba kane ka namjop ka Combine 12 FC ka la ïohrah ïa ka trophy ryngkat ka song pisa kaba 15,000 tyngka. Katba ka Traisiej FC ka la wan kyrdan balai hadien ba ka la jop ïaka Mali FC da 1-0 ha ka jingïaknieh ïa ka kyrdan balai.
Ka phangpdeng jong kane ka lympung ïalehkai phutbol futsal ka long “Say no to Drugs and Yes to Sports” kaba mut “Ong Em ïa u Drok bad hooid ïa ki Jingïalehkai.
ïa ka final ha kane ka sngi la wan ban sakhi lang da u bah PT Sawkmie, MLA barim kum u kongsan ha ka jingdon ryngkat u Bah Teiborlang Pathaw, MDC ka Mawlai Constituency, u bah Samuel Biam, President ka Seng Samla Mawlai Pyllun, u bah Sam Diengdoh bad kiwei kiwei.
Ha kane ka sngi u bah Sawkmie u la nohsynñiang ruh da ka song pisa sha ka Samkhamti na ka bynta ban ïa donbyntalang ha kane ka lympung.
Ha kane ka sngi la sam ruh ïa ki khusnam shimet, u Alfred Kharwanlang ka YTBC u la ïoh ïa ka khusnam Goldenboot hadien ba u la ïoh ban thep 7 tylli ki kol, katba ïa ka nam Best Goalkeeper la ïoh da u Brandon Diengdoh na ka Second Chance FC,bad ïa khusnam Player off the tournament la ïoh da u Welbert Kharlukhi na ka Combine 12 FC.
Ha kane ka lympung ïalehkai jong ka Mawlai Futsal League ki la don baroh haduh 64 tylli ki kynhun kiba la poi ban ïashimbynta ha kane ka tournament.
