Nongstoiñ, Ïaiong 26: Ka kynhun ïalehkai jong ka Christ King Higher Secondary School Riangdo na ka liang ki shynrang bad ka St Peter’s HSS Pynengrei na ka liang ki kynthei, ki la rah ïa ka nam lahduh jong ka lympung Basketball ba nyngkong eh ba la pynïaid da ka Basketball Association of West Khasi Hills ha Nongstoiñ.
Ha ka jingïakhun phainal kaba la long ha ka sngi ba ar jong ka taiew ha Basketball Court New Nongstoiñ, ka St Peter’s HSS ka la lah ban jop noh ïa ka St Francis D Assisi School da 31 la 11 points. Katba na ka liang ki shynrang, ka Christ King School ka la jop salit da 33 la 32 points pyrshah ïa ka Anderson HSS.
Hadien jong ki jingïakhun phainal kiba itynnad bha khamtam ha ka liang ki shynrang, ka Basketball Association West Khasi Hills ka la pynlong ïa ka jingsam khusnam sha ki kynhun kiba la poi sha ka phainal bad rah nam lahduh. Nalor ka khusnam sha ki lahduh, ka Association ka la jied ruh ïa ki khusnam ba kyrpang ba kynthup ïa ka Most Promosing Player na ka liang ki kynthei sha ka Mystica Avril Ïawphniaw jong ka St Peter’s bad na ka liang ki shynrang la ïoh da u Wankitboklang Lyngkhoi jong ka Christ King Higher Secondary School Riangdo.
Ha kane ka sngi, la donlang ruh da u Kongsan ba don burom u ba long ruh u MLA jong ka Mawphlang Constituency, nangta u Bah Mosklander Marngar uwei na ki samla rangbah la thaiñ Nongstoiñ. Kiwei pat ki kynthup ïa ki nonghikai, ki nongïalam jong ka Association ba kynthup ïa u Bah Donald Nongsiang President, Bah Wallambok Ïawphniaw General Secretary lem bad kiwei.
Na ka liang u kongsan haba ai jingkren, u la pynpaw ïa ki kyntien kyrkhu kyrdoh bad ai mynsiem sha baroh ki rang bad thei ïalehkai Basketball jong ka dong ka thaiñ. U la ai kitbok ruh ïa ka Association ba kan nang lah ban leh khambha shuh shuh ha ki por ki ban dang wan. Hadien kane u la shim ruh ïa ka bynta ban sam ïa ki khusnam sha ki rang bad thei ïalehkai.
