Nongpoh, Rymphang 01: Ka jingïakhun phainal jong ka First Inter Block Football Tournament kaba la pynlong da ka Dorbar Shnong Mawdiangum ka la poi sha kaba kut haka sngi Saitjaiñ, ha kaba ka kynhun khun samla jong ka Block I ka la ioh rah ïa ka nam lahduh hadien ba ka la pynliem ïa ka Block III da 2–1 kol.
Ïa ka jingïakhun phainal la pynlong ha madan ïalehkai jong ka shnong Mawdiang-Um, bad haka jingpynkut noh ïa kane ka lympung kynjat bol, u Bah Mayralborn Syiem, MLA ka Nongpoh, u la shimbynta kum u kongsan. La sakhi lang ruh ha kane ka sngi da u Bah Luistar Lyngdoh, Acting Sordar ka Nongpoh Elaka Sirdarship, u Bah Linus Lyngdoh, Rangbah Shnong Mawdiang-Um, ryngkat bad ki riew rangbah shnong, ki longkmie longkpa bad ki khun samla.
Kane ka lympung kynjat bol kaba la neh haduh lai sngi ka long ban ai lad ïa ki khun samla ba kin pyni ïa ka sap jingïalehkai jong ki, bad ruh ban kyntiew ïa ka jingïadon bynta jong ki samla ha ki kam sports. Ha kajuh ka por, la pynpaw ba kane ka jingïalehkai ka long kawei na ki lad ban ïakhun pyrshah ïa ki jingmlien sniew, khamtam eh ïa ka jingdih drok kaba la ktah jur ïa ka imlang sahlang.
Na ka liang ka Dorbar Shnong Mawdiangum ka la sam ïa ki khusnam sha ki kynhun ba jop bad kumjuh ruh kaba rem. Hadien ka jingpynkut ïa ka prokram, la pynlong ruh ïa ka jingïabam khana paidbah ha madan ïalehkai, ban pyni ba kum ka shnong ka dang ïatylli ban mih nala ki jong ki iing ki sem khamtam ban pynpaw ïaka jinglong shipara.
