Shillong, Naitung 11 : Ka Azriel FC ka la ïohrah ïa ka namlahduh hadien ba ka la lah ban pynliem ïa ka Rebel SC da 2-0 ha ka final jong ka 1st 7Aside Knock Out Football Tournament ba la pynïaid da ka United Comrades SC ha madan Shillong Polytechnic, Mawlai Kyntonmassar ha ka sngi Saitjaiñ ka 10 tarik u Naitung, 2022. Ha kane ka lympung ïakhun ki la don baroh 32 tylli ki kynhun kiba la ïashim bynta.
Ka Azriel kum ka Lahduh ka la ïoh khung ïa ka song pisa ba 20,000 tyngkat ryngkat ka trophy bad ka Rebel kaba wan baar ka la ïohrah 10,000 tyngka bad ka trophy. Ïa kine ki khusnam pisa la bei da u MLA ïa ka Lahduh bad ïa kaba wan baar da u bah Embhahlang.
Ha kane ka sngi la sam ruh ïa ki khusnam shimet, ïa ka nam Best Goalkeeper la ïoh khur da u samla Hame Shabong, ka nam best player ka la leit sha u Batskhem Thangkhiew bad top Scorer sha u Wilbert Marbaniang ba la ïoh ban thep saw kol.
Ha kane ka sngi la ïa don lang u MLA ka Mawlai Konstitwensi u Bah Process T Sawkmie kum u kongsan, kynthup ïa u bah Embhahlang Syiemlieh, u president ka Seng Samla Nongpathaw, Mawdatbaki, bah Pyndap Lawrynniang, u rangbah dong Nongpathaw bah Bonifast Tongwah bad kiwei kiwei.
Haba ai jingkren u Bah PT Sawkmie u la pynpaw ïa ka jingsngewkmen ban ïohi ba ka phutbol ka la sdang kiew bha mynta bad ki don 10 ngut ki khynnah kiba la ïakynduh ïa u ban leit shah hikai ha Baichung Football Academy.
“Mynta ki don bun ki khynnah kiba ïoh leit hikai sha kiwei ki klob shabar jylla, sngewtynnad ba ym tang ki shynrang hynrei ki don ruh ki kynthei kiba leit shah hikai,”
U la bynrap, “Ban kiew donkam ban trei shitom, hap ban aiti ne sacrifice.”
U pynpaw ruh ïa ka jingsngewkmen ban iohi ba ki klob ki lah ban siew bha ïa ki nongïalehkai ha kine ki sngi kiba mynta.
Katba na ka liang u Bah Embhahlang Syieimlieh, kum uba shah khot sngewbha kyrpang, u la pynpaw ïa ka jingkiew ka rukom ïalehkai ha kine ki sngi bamynta, ka standard ka la kiew bha bad kyrmen ba kin nangkiew sha kawei ka kyrdan.
“Ngi ïohi bun ki bar jylla ha ki klob bapher ha ki por ba la leit hynrei mynta ngi ïoh ïa ka jingïoh rung ki khynnah lajong ha kine ki klob ban mih bujli ha ki jaka jong ki bad kane ka long kaba sngewtynnad bha,” ong u Bah Embhah.
