Shillong Nailar 01: Katkum ka jingïathuh jong ki pulit la ong ba u Hemanta Kr Hajong u la phah ka jingujor ba ha ka 26 tarik u Naitung, katba ma u bad la ki paralok jong u bad uwei u briew u bym lah ban ithuh katba ki dang leit jingleit da ka thuk thuk jong u kaba don u nombar ML-08G-5608, hynrei ka thuk thuk ka la kynduh bad ka jingjia aksiden ha Betasing, Nirgini (SWGH).
Kham hadien pat utei u briew u bym lah ban ithuh uba la shong lang hapoh ka thuk thuk jong u, u la pyrshang ban rah bad rong ei ïa ka thuk thuk jong u bad ka mobile phone bad u la phet krad na katei ka jaka.
Kawei pat ka khubor ba la ïoh na ki pulit la ïathuh ba ki pulit ki la ïoh jingtip ba ha ka 26 tarik u bnai Naitung, ki nongshong shnong ka Piljigre (WGH) ki la ïohi ïa kumba 6 haduh 7 ngut ki suba Bangladeshi kiba la rung beaiñ shapoh u pud u sam ka India ha ka shnong.
Hynrei na ka liang ki nongshong shnong ki la ïoh bat tang ïa uwei uba kyrteng u Tofijul Ali bad ki la shoh ïa u, katba kiwei pat ki la ïoh lad ban phet.
Kham hadien ki pulit ki la lap bad kurup 5 tylli ki mobile charger, uwei u Bluetooth headphone, kawei ka Aadhaar card ha ka kyrteng u Tofajol Sk, bad kiwei kiwei.
