Shilong, Naitung 14: U MLA ka Shillong West Constituency u Bah Mohendro Rapsang ha ka sngi Palei jong ka 14 tarik Naitung u la pynpaw ïa ka jingpyrshah halor ka jingthmu ka sorkar ban ai jaka bad pynkynriah ïa Harijan kiba shong ba sah ha Them Ïewmawlong sha ka jaka ba don hajan ka R.P Chest Hospital kaba don ha Mawbah, Upper Mawprem.
Haba ïakren bad u Mawphor u Bah Mohendro u la ïathuh ba na ka liang jong u, u la ïakynduh ruh bad u Bah Prestone Tynsong uba dei Chairman ka High Level Committee(HLC) kaba ka sorkar ka la thung ba kan peit bniah ïa i kot ki sla bad ïa ka jingthmu ban pynkynriah ïa ki Harijan kiba shong ba sah ha katei ka jaka.
U Bah Mohendro u a ïathuh ba ka jingpyrshah jong u ban pynkynriah sha katei ka jaka ka long namar ka jaka kaba kan ai ka don ha jan ka jaka ba ai jingsumar ïa kiba pang TB, ka jaka kaba kin ai na bynta ki 342 tylli ki longïing kan wanrah ïa ka jingkhapngiah ha shnong ha thaw bad ruh namar ki nongïalam shnong bad ki paid nongshong shong hi baroh kim pdiang satia ïa kane ka jingthmu ka sorkar ban wan buh Colony ha katei ka shnong.
Shuh shuh u la ïathuh ba na ka liang jong u ryngkat ki nongïalam shnong kin sa leit ban ïakynduh bad u Bah Prestone ban pynpaw ba da lei-lei kin ym pdiang ïa kane ka jingthmu ka sorkar.
Kumban shu pynkynmaw ba ka sorkar ha ka sngi Balang jong ka 13 tarik ka la ïathuh ha khmat ka Ïingbishar Meghalaya High Court ba ka sorkar ka la dep pynkhreh ïa ka Blue Print bad ka la rai ruh ba kan ai jaka 3 Akar ha jan ka R.P Chest ha Mawbah ryngkat ka ïing paki bun mala ba kan tei na bynta ki Harijan kiba shong ba sah ha Them Ïewmawlong.
