Nongpoh, Nailur 05: U MLA ka Jirang Constituency, u Bah Sothenes Sohtun mynta ka sngi u la pynpaw paidbah ba kum u Nongmihkhmat na Jirang Constituency u pyrshah jur ïa ka jingthmu ban wan rah ïa ka kam khalai ba la tip kum ka ‘Casino’ ba la thmu ban wan rah ha ka thain Khanapara kaba dang hap ha u pud u sam jong ka Constituency jong u.
Ïa kane ka jingpyrshah ban wan rah ïa katei ka Casino ha ka thain Khanapara, u MLA ka Jirang Constituency u la pynpaw paidbah ba u pyrshah jur ïa ka Casino ka dei hadien ba u la kren sha ki lad pathai khubor mynta ka sngi ha Nongpoh.
Haba ïa kren bad ki Lad Pathai khubor, u MLA ka Jirang, u Bah Sosthenes Sohtun, u la ong ba kum u MLA ka Jirang Constituency u pyrshah jur ïa kane ka Casino ban wan rah hapoh u pud u sam jong ka Constituency jong u bad u la pynpaw ruh kum u MLA u hap ban sngap ïa ka sur jong ki paidbah, nanmar nadauh ba la ïa kren halor kane ka Casino kiba bun hi ki paidbah na Constituency jong u bad wat na Ri Bhoi baroh kawei ki la pyrshah jur ïa kane ka Casino.
Halor kane ka jingthmu ban wan rah ïa katei ka Casino, u la ïathuh ruh ba u la dep ban kren wat ïa u myntri rangbah ka jylla, u Symbut Myntri ka jylla bad kumjuh ruh u myntri sorkar ba dei peit ïa kane kane kam, ha kaba kum u MLA na Jirang Constituency u pyrshah ban wan rah ïa kane ka Casino, kaba dei kawei na ka kam khalai ba la pyrshah jur da ki paidbah ka constituency bad ka them Ri Bhoi hi baroh kawei.
Namarkata, na ka liang jong u Bah Sosthenes Sohtun kum u MLA ka Jirang Constituency, u la buh ka jingkyrpad ïa ka sorkar jylla lyngba u myntri rangbah bad ka kynhun ki myntri hapoh ka sorkar ba ki dei ban sangeh ban wan rah ïa kane ka kam khalai bad kum ka sorkar ka hap ruh ban burom ïa ka sur jong u paidbah babun balang, u la bynrap.
