Mawkyrwat, Nohprah 12 : Ki Sengbhalang kiba kynthup ïa ka Khasi Students Union jong ka Mawkyrwat Circle, ka Hyñiewtrep Achick National Movement jong ka South West Khasi Hills District mynta ka sngi ki la pyrshah jur ïa ka jingleh jong ka sorkar da kaba ka thmu ban pynkynriah kam noh ïa ki ophisar napoh ka South West Khasi Hills District khlem pat dei por ka ktah shisha ïa ki paitbah jong ka district.
Kumta, haba kren ha ki lad pathai khubor, ka Khasi Student’s Union (KSU) Mawkyrwat Circle lyngba u samla Plosbor Kharjahrin ubCircleu General Secretary ka KSU Mawkyrwat Circle ka la pyrshah jur ïa ka jingthmu jong ka Sorkar Jylla ban pynkynriah kam ïa ki katto katne ngut ki ophisar na South West Khasi Hills District da kaba kynnoh ba da kane ka rukom leh kan sa ktah jur ïa ka roi ka par hapoh ka District, namar ka dang long ka District kaba dang lung bad kaba dang don ha ka lynti ban pyrshang ban kiew bad kynjoh lang ha ka kyrdang jong kiwei pat ki District ba la kham roi.
U la ong ruh ba katkum ka jinglum tip da ka Seng, na ka liang ka Sorkar jylla ka thmu ban pynkynriah kam noh ïa u Bah B. Jyrwa, MPS uba dei u Superintendent jong ki Pulit, South West Khasi Hills District, bad ia u Bah J. Nongsiej u Executive Engineer ka tnat PWD (Roads) jong ka Mawkyrwat Division kiba dei ki ophisar kiba la wan trei ha Mawkyrwat mynta dang hapoh ïa ka shisnem.
Namarkata, ula ong ruh ba kane ka jingpynkynriah kam ba khah khah ïa ki heh ophisar sorkar hapoh ka South West Khasi Hills District kam dei tang mynta ka kynti hynrei ka ju jia na ka por sha ka por, bad ka la ju long ruh ka daw jong ka jingthut ha ka roi ka par jong ka District. Kumta ka KSU lyngba u General Secretary ka dawa na ka sorkar ba ka dei ban pynsangeh noh mardor ïa katei ka jingthmu pynkynriah kam bad ban ailad shwa ïa kitei ki arngut ki ophisar ba kin trei ïa ka kam katkum ki kyndon ba la buh.
Ha kawei pat ka liang ka HANM South West Khasi Hills District lyngba u bah Lambokstar Marweiñ uba dei u President ka la kyntu jur ïa ka sorkar bad kum juh ruh ïa u Deputy Chief Minister jong ka jylla, u bah Prestone Tynsong ba un sngap lem ïa ka sur jong ki paidbah ka South West Khasi Hills District namar kumba long mynta ïa kine ki ophisar ba dei paitbah ïa ka bha ka miat jong ka district ki dang donkam ba kin shong ha ka shuki ban pyndep ïa ki kam ba ïa dei bad ka roi ka par bad ka suk ka saiñ hapoh ka distrik.
