Pyrshah ki paidbah ka Daistong ban shna karkhana dewbilat ka Shree Cement Ltd

Khliehriat, Naiwieng, 27: Ki paidbah nongshong shnong jong ka shnong Daistong, East Jaiñtia Hills District ha ka jingiakynduh bad ki pathai khubor mynta ka sngi ha shnong Daistong ki la pynpaw ka jingpyrshah jur ïa ka jingthmu ban shna ïa ka karkhana dewbilat ka Shree Cement Ltd ha shnong Daistong, ki la pynpaw ruh ka jingsngewsih halor ka jingbym tip ka Dorbar Shnong ïa ka ai syrnot No Objection Certificate (NOC) U Rangbah Shnong sha katei ka company dewbilat.
Katkum ka jingpynbna ba la pyllait ha ki pathai khubor ka Meghalaya State Pollution Control Board ka la pynbna ba kan pynlong ïa ka public hearing ha ka 19 tarik u bnai nohprah 2025 na ka bynta ban shna ne tei ïa ka karkhana pynmih dewbilat ka Shree Cement Ltd ha ka dong Khara Siang Lum Pyrshin ha shnong Daistong.
Halor katei ka jingthmu ban shna karkhana hapohshnong, ki paidbah kiba ju im ja da ka rep ka riang ki la pynpaw ka jingsngew diaw bad sngewsih bad ong ba ka jingdon ka karkhana kan ktah jur ïa ki um ki wah, ïa ki jaka rep bad ktah ruh ïa ka lyer ba ring mynsiem.
U bah Philemon Sukhlaiñ uba dei uwei na ki nongrep uba im da ka rep ka riang u la pynpaw ka jingsngew diaw bad ong ba kane ka jingwan jong u lem bad ki paidbah nongrep kiba na ka shnong Daistong ka long ban pynpaw ïa ka jingpyrshah jong ki ïa ka company Shree Cement Ltd kaba thmu ban shna karkhana dewbilat hapoh shnong bad ong ruh ba hadien ba ki la iohi ïa ka jingpynbna ba kan sa don ka public hearing kane ka la pynkyndit ïa ki nongshong shnong namar ki paidbah ha shnong kim don jingtip eiei halor kane bad kynnoh ba dei u Rangbah Shnong uba shim rai marwei bad ai ïa ka NOC ban shna ïa ka karkhana hapoh shnong “Ngi kum ki nongrep ngi la dep buh jingthoh sha ka tnat Meghalaya State Pollution Control Board bad sha Jaiñtia Hills Autonomous District Council kata naduh ka 13 tarik u bnai risaw 2024 bad ngi iohi ba kane ka jingleit buh jingthoh jong ngi ka long lehnohei namar ngi khlem ioh pdiang satia kano kano ka jubab ne ka jingiakren”
U Bah Philemon Sukhlaiñ u la ong ba “Sawdong kane ka jaka ba mut ban shna karkhana ki don ki jaka rep kiba heh kiba ngi la rep naduh ki por mynshwa haduh mynta bad ruh hangne ha shnong ngi im da ka rep ka riang, ka ri jing ri bad ha ka sngi ba pynlong ïa ka public hearing ruh ha ka 19 tarik ngin ieng pyrshah beit bad kaba sngewsih ruh ka long ba ngi ki nongshong shnong ngi la shah shet kylla ruh ha ka elaka Nongkhlieh namar hadien ba la rai ha ka dorbar elaka ba ïa kane ka karkhana yn shna ha Ryngksan kaba jngai na shnong bad ngi la rai ruh da kaba ngi ïa rah kti hynrei ngi iohi pat ha ka jingpynbna ba pynmih da ka Meghalaya State Pollution Control Board la pynbna ba yn shna ïa kane ka Shree Cement Ltd ha shnong Daistong, ngi la sngew kyndit haduh katta katta halor kane kumta ngi hap ban ïa mih kumne ban pyrshah namar ngi kwah ban ïada ïa ka mariang, ïa ki jaka rep, ki um ki wah kiba don hapoh shnong jong ngi khamtam ka lyer ba ngi ring mynsiem, ngi da pynrem jur ïa ki dkhot EC jong ka elaka, ïa u Doloi Elaka Nongkhlieh bad u Rangbah Shnong kiba la shu leh jubor khlem ka jingmynjur lang ki paidbah, ngi la pyrshang ban thoh shithi sha ki dkhot ka EC bad ki la jubab ba ka jingrai jong ka elaka ka long ba ka elaka ka ailad beit ïa kano kano ka company bad ka jubab ruh kam dei da kaba ngi iakynduh ne da kaba iakren hynrei ki la jubab da ka shithi” u la bynrap ruh ba kane ka jingpyrshah kan nang ïai bteng bad kane kaba mynta ka dei tang ka jingsdang bad u la pan ruh ka jingkyrshan na ki paidah bad na ki seng bapher bapher ba kin kyrshan lem ïa ki nongshong shnong kiba pyrshah iaka jingwan ka karkhana hapoh shnong.
U bah Chwamiki Patwet u la ong “Ngi kum ki nongshong shnong ngim don jingtip eiei ïa ka jingai NOC u Waheh Shnong, katkum ka Dorbar Shnong ha ka dorbar ba la pynlong ha ka 8 tarik u bnai nailur la don ka jingpynbeit na ka liang ka shnong ba hap ban don shwa ka jingpynbeit ne ka plan da ki dkhot committee bad ki riew rangbah na ka shnong bad hadien ba la dep ban ïa pynbeit lang katkum ka jingiamynjur ne Agreement hap ban don ka jingpynsngew ne jingtyrwa hapoh ka Dorbar Shnong, hynrei u Waheh Shong um shym la iaid ne um shym leh sataia katkum ka jingiakren ha ka dorbar hynrei u la shu ïaid hi shakhmat, te na ka liang jong ngi kum ki longkmie, long kpa, ki khun samla ynda la iohi ba mih ka jingpynna ne ka notice jong ka public hearing ngi sngewsih bad sngewdiaw halor kane na kata ka daw ngi ki nongshong shnong kiba ieng pyrshah ngi pyrshang ban wad ki lad ki lynti ban pynduh pyndam noh ïa kane ka jingthmu ban shna ïa kane ka karkhana dewbilat hapoh shnong, ka Shree Cement Ltd, kawei ruh kumba ngi iohi da la ki khmat ba na kane ka jaka ba shong ba sah ki briew haduh ka jaka ban shna ïa ka plant ne karkhana kam jngai wat tang shi kilo mitar ruh, kaba pynduh nong shuh shuh ïa ngi ki nongshongshnong ka dei namar ngi hangne ha shnong shispah na ka shispah ngi dei kiba im ja na ka ka rep ka riang, te lada wan kane ka karkhana kan pynjot ïa ki hali ki pynthor bad ki jaka kiba ngi ju rep, kan pynjot ruh ïa ki klaw ki btap, ki dieng ki siej,ki doh um doh wah khamtam ki umbam um dih, ngi ngin ieng skhem beit ban pyrshah jur ïa ka jingleh lyndet u Rangbah Shnong, ngi ki nongshong shnong bad ka dorbar shnong hi baroh kawei ngim don jingtip ba une u rangbah shnong u la dep ban ai NOC ïa kane ka company”
Ka kong Ridabha Sutnga kaba dei ruh ka President Village Organisation Daistong ka la pynpaw ka jingsngew khia bad pyrshah jur ïa kane ka jingwan ka company Shree Cement Ltd hapoh shnong bad ong ruh ba ki dang bun bha ki paidbah kiba dei ki nongshong shnong ki ba pyrshah ïa kane ka karkhana dewbilat ka ban wan hapoh shnong ha ka jaka ba ju khot ka Khara Siang Lum Pyrshin “Ka jaka ban shna ïa ka karkhana ka don hajan bha bad ka jaka ba shong ba sah ki briew, lada phai na ka diang na ka mon ngi iohi ba ki don sawdong da ki pynthor kba te na kata ka daw ngi kum ki khun shnong kiba dang im da ka rep ka riang bad da kaba rep ha ki pynthor ngi im ngi biang baroh shisnem na kata ka daw ngi pyrshah jur ïa kane ka karkhana namar lada wan kane ka karkhana ngin shah ktah ha baroh ki liang naduh ka koit ka khiah, ka um bam um dih bad kane ka jaka ba mut ban shna ïa ka karkhana ka dei ka jaka kaba ngi ju sngewtynnad bha ban leit wad ïa ki jhur khlaw ki ba tei ïa ka met te lada wan kane ka company kan pynduh pyndam lut ïa kine baroh”
Ka shnong Daistong kaba don ha East Jaiñtia Hills District ka dei ka shnong kaba don 140 spah tylli ki longïing bad ka jingdon ki nongshong shnong ka la kot haduh 950 ngut, ki la don 60 haduh 70 tylli ki longiing kiba ieng pyrshah ïa kane ka public hearing kaba thmu ban shna ïa ka karkhana saiñ dewbilat, ka Shree Cement Ltd, ki nongshong shnong ki dei kiba im ja bad pyndap ia ka iing ka sem jong ki da kaba rep bad ri jingri, ka dei ruh ka shnong kaba dang bun bha ki khlaw ki btap kaba don ïa ka mariang kaba kup rong jyrngam.