Shillong, Jylliew 29 : Hadien ba ka MeECL ka la pynmih jingpynbna halor ka rukom pynlip bording kaba thymmai kaba la sdang naduh ka por shiteng miet jongka Sngi Ba Ar, ki paidbah ka nongbah Shillong ki pynpaw ka jingsngew pyrshah jur haduh katta katta namar ka jingpynlip kaba saw kynta lynter naduh ka por 1 baje mynstep haduh ka por 5 baje mynstep ka la long kum ka jingpynshlur bad ai mynsiem ïa ki nongtuh nongthiem ban ïoh leh katba ki mon haka jingdum jongka miet.
Haba ïakren bad ki katto katne ngut ki riew paidbah ki la ong “ Nalor mynta ba dang kynrei ka jingshah tuh shah thiem bad jur ki jingsniew ha kane ka nongbah, ka sorkar pat ka khlem pyrkhat ïa kita bad i kumba ka ailad ban ïoh lenmon ki nongtuh nongthiem da kaba ïai pynlip bording haduh saw kynta lynter. Ka la dei ban leh kum mynshwa ban pynlip ha ka por mynstep 10 haduh 11 ne wat haduh 12 baje ruh kam pher bad mynmiet pat 1 baje haduh 2 baje bad nangta 5 baje haduh 6 baje ruh ba la shai ka bneng”.
Na ka liang ki kmie ki kpa pat ki pynpaw ka jingsngew khia jur ban pynlip haduh 4 kynta lynter namar ki don ki khun ki kti kiba sngew tynnad ban khreh kot haba la kynjah briew bha ka pyrthei.
Katba kiba shong dukan pat ki ud namar kane ka jingpynlip bor ding bun kynta ha ki katto katne ki jaka ha ka por mynsngi bad janmiet ka la ktah palat ïaka die ka thied jongki khamtam hakum kane ka por ba ka ïew ka dang shu sdang ban khie rasong.
Na ka liang ki nongpynmih kot khubor ruh ki ud bad sngew pyrshah halor kane ka jingpynlip bor ding ba saw kynta lynter namar ka ktah palat ïaki namar kim ïoh shuh ban shon ïa ki kot khubor haka por kaba biang kumta ki la kyntu ïaka sorkar ba kan peit bad weng ïa kane ka jingeh da kaba pynkylla biang ïaka jingpynlip bording ne ban weng noh shisyndon kumba la dep kular da u Symbud Myntri Rangbah bah Prestone Tynsong.
