Pyrshah ki Nongsynshar Shnong khappud ban buh BOP jngai na u pud bad Assam

Shillong, Nohprah 05 : Ka Synjuk ki Rangbah Shnong Border Areas na Ri Bhoi District ki la dawa na ka sorkar jylla ba ka Border Outpost ba ka kular ha ka thaiñ jong ki ar tylli dei ban buh ha khappud bad ka jylla Assam ym ban leit buh sha pdeng shnong kaba jngai na khappud.
Haba kren bad ki lad pathai khubor hadien ba ki la dep ban aiti ïa ka dorkhas ha u Myntri Rangbah ka jylla bad ruh ha u CEM ka KHADC, u President ka Synjuk ki Rangbah Shnong, Bah Blikstar Sohtun u la ong, “Ngi kwah ba ka Border Outpost kadei ban don hakhappud hi ban ïada ïa ki Khasi jongngi kiba sah ha kito ki jaka ym ba kin don shajngai na khappud.”
Katkum ka jingong jong u, na ka liang ka Synjuk ki kwah ba katei ka ktem pahara khappud kadei ban don ha Umtlih bad ha Ummat ym ha Thadrang bad Tyrso kumba kwah ka sorkar.
“U CEM u la ai ka jingkular ba un sa pynsngew ïa kane ka mat bad ka sorkar bad pynbeit noh ïa kane ka bynta kaba ki paidbah ki pyrshah jur,” ki la ong.
Na ka liang u MDC ka thaiñ, Bah Charles Marngar u ola ong ba dang shen u la lum ïa ka Synjuk ki Nongsynshar shnong ha Mawlasnai bad ki la shim da kawei ka sur ban ym shah satia ban buh ïa ka Outpost ha Thadrang lane ha Tyrso.
U MDC u la ong ba ruh ba ki paidbah ki kwah ba ka Outpost kadei ban long ha khappud ym ha kitei ki jaka kiba jngai na khappud. “Ki ong ba ka BOP yn buh ha khappud, kumta kumno yn buh ha Tyrso bad Thadrang. Ngi la dep ban kynduh ïa u Myntri Rangbah bad ruh ïa u CEM ban pynpaw ïa ka jingpyrshah halor kane,” ong u MDC.
Na ka liang u MDC u la buh jingkylli ruh ba kumno ka Assam nalor ba ka la don lypa ka Outpost ka dang thmu ban buh biang sa kawei ha Umsarang katba ka Meghalaya pat kam nud. “Lada ka Assam ka leh watla ka dei ha jaka kajia ngi ruh ngi dei ban leh lang kumjuh,” u la ong da kaba bynrap ba dei ban pynbiang ïa ki bor pahara ban ïada ïa ki paidbah kiba sah ha khappud.
Shuh shuh u ong ruh ba lada buh ïa ka OP ha Thadrang ka pyni shai ba u pud u sam jong ka Meghalaya u dei na Thadrang. Na ka liang ka kynhun ki ïai dawa beit ba ka jingbuh ïa kitei ki ktem pahara kidei ban long beit ha Ummat bad Umtlih ha kaba ki shnong ki la kloi ban ai wat ïa ka jaka ruh.
Halor kane na ka liang u CEM ka KHADC, Bah Titos Chyne u la pyntip ba shen un sa hiar sha katei ka thaiñ ban kynduh ïa ki paidbah.