Shillong, Nailur 25 : Ka Voice of the People Party (VPP) ka la ieng pyrshah ïa ka rai jong ka sorkar ban pynsiew tulop ïa ki nongtrei jong ki lai tylli ki district council kiba don ha ka jylla.
Haba kren bad ki lad pathai khubor, u President ka Party ba dei ruh u MLA ka Nongkrem, Bah Ardent M Basaïawmoit u la ong, “Ngi la pyrshah ïa kane ruh ha ka Dorbar Synrai kaba dang shu dep shen.”
Ha ka jaka ban siew ïa ka tulop, u Bah Ardent u la ai jingmut ba ka sorkar ka lah ban kyntiew pynban ïa ka mangtyngka na ka bynta ki District Council, nangta ban don ia ka jingkyrshan pisa kaba shisien ai bad khamtam eh ban pyllait tikna ïa ka bhah ba ki district council ki dei ban ïoh.
U la ong ba na ka liang u Symbud Myntri Rangbah u la kular ïa kane ha Iing Dorbar bad kumta ki khmih lynti ba ka sorkar kan pynurlong ïa kane.
Ha ka por ba ka Garo Hills Autonomous District Council (GHADC) bad ka Jaintia Hills Autonomous District Council (JHADC) ki lah ban mad ïa ka jingtyrkhong pisa hynrei u Bah Ardent u la ong ba ka KHADC ka kham don ha ka jaka kaba kham shngain lada phai ha ka rukom pynmih ïa ka khajna.
“Ngi ïohi ba kam don kano kano ka jingeh ha KHADC lada jia ba kam don ka jingpynthut na ka sorkar. Ka KHADC ka la sakhi ïa ka jingnang kiew ka jingpynmih ïa ka khajna,” u la ong.
Une u heh ka VPP u la bynrap ba ki District Council ha Meghalaya ki long kiba kyrpang bad ki don ka jingïadei kaba kyrpang bad ka sorkar jylla katkum ka Khyrnit ba Hynriew jong ka Riti Synshar ka Ri.
Ha ka jingïohi jong u, ki jingeh ki lah ban mih na ka daw jong ka politik, hynrei u ïai ban pat ba dei ban burom ïa ka jinglong kyrpang jong ki ADC.
