Shillong, Naitung 21 : Ka Riwar Mihngi Social Welfare & Sports Association (RMSW&SA) hapoh ka jing ïalam jong u Bah Dewi Khonglah kum u President bad Bah Lo Khonglam kum u Secretary, ki pynpaw ïa ka jingpyrshah jur ïa ka jingkhot jingïalang ka M.F.A. ha ka 23/7/2022 ha Pynursla khlem da kynjoh ktien ne ïa syllok bad ka Association (RMSW&SA).
Ka Riwar Mihingi Social Welfare & Sports Association (RMSW&SA) ka dei kawei na ki Association ba la rim tam ha ka thaiñ Riwar Mihngi. Ka dei ruh ka affiliated Unit jong ka Meghalaya Football Association, kaba dang don bad dang treikam haduh kine ki sngi.
Ka Executive Committee jong ka Association ba dang shu dep long shen ka la rai ban pyrshah jur ïa katei ka jingleh don bor ka M.F.A. La kyntu ruh ïa Affiliated Club jong ka Riwar Social Welfare and Sports Club (RMSW&SA) ba ymdei ban leit ïashim bynta ha katei ka jingïalang.
Kane ka long katkum u kyrwoh na ki nongïalam ka Riwar Social Welfare and Sports Club.
