Shillong, K’lyngkot, 25: Ka President jong ka Mahila Morcha, BJP Meghalaya Pradesh ka Kong Susuki Parïat ka la pynpaw ïa ka jingsngewsih halor ka jingbym pynrung jong ka Sorkar Jylla ïa ka ktien Jaiñtia ha ka State Anthem ba la pyllait dang shen da ka Sorkar Jylla ha ka jingrakhe ïa ka jingdap 52 snem ka jingïoh jylla bapura jong ka Meghalaya kaba la long ha Tura, West Garo Hills District.
“Nga kum ka President jong ka Mahila Morcha nga sngewsih ba khlem pynrung ïa ka kyntien Jaiñtia ha ka State Anthem. Kumba ngi tip ïa kane ka mat la ujor ruh da u Bah Alexander L. Hek uba long u Myntri Sorkar na ka BJP hapoh ka jingïalang jong ka kynhun Myntri hynrei ka Sorkar kam shym la sngap satia,” la ong ka Kong Pariat ha u kyrwoh.
“Ïa ka Meghalaya ngi tip ba la phiah ha ki lai tylli ki thaiñ, ka rilum Khasi, ka rilum Jaiñtia bad ka rilum Garo. Kumta ha ka jingsngew jong nga, ha ka jingrwai ruh dei ban pynrung ïa ki lai tylli ki jait ktien jong ki Khasi, ki Jaiñtia bad ki Garo,” ka la ong.
“Hapoh ktien Khasi ki don bun ki tnat ktien kum ha War, Maram, Bhoi, ka ktien KHASI ka dei ka ktien kmie ïa kine ki tnat ktien. Katba ka ktien Jaiñtia ka dei beit kajuh la ka dei ha Jowai ne ha Amlarem, Sutnga, Wahïajer, Shangpung ngi pyndonkam beit tang ka ktien Pnar. Ka Garo ruh ki kren kumjuh la ka long ha Tura ne ha Williamnagar ne ha kano kano ka bynta jong ka rilum Garo. Namarkata ngi dei ban burom ïa kane,” la ong shuh shuh ka Kong Pariat.
