Shillong, Naiwieng 09: Ki nongtrei bad ki dkhot jong ka North-Eastern Hill University ki la pynpaw ïa ka jingpyrshah kaba jur halor ka jingpynlong ïa ka jingïalang kaba 193 ka Executive Council (EC) jong ka NEHU ha New Delhi ka ban long ha ka 14 tarik jong mynta u bnai, ha kaba la ong ba kane ka dei tang ka jingpynlut kai ïa ka por bad pynkheiñ ïa ki jingbthah jong ka Ministry bad kiwei ki jingmynjur kiba shim mynshwa.
Ha ka shithi ba la phah sha Pro-Vice-Chancellor ka University Prof S Umdor, na ka liang ka NEHUTA ka la ong ba ka pynpaw ïa ka jingpyrshah ïa kane ka jingkhot ban pynlong ïa ka jingïalang kaba dei shabar jong ka university jong ka Shillong.
Ka seng ka la kynnoh ba u Vice-Chancellor Prof PS Shukla, uba la jah na la ka kamram mynta lajan shisnem u la pyrshang ban pynïaid ïa ka jingïalang ha kaba kane kadei ka jingpynkheiñ ïa ka jingbthah ruh jong ka Ministry ka tnat Pule Puthi.
Lah kynnoh ruh ba na ka jingdon jong u Prof Shukla ha NEHU ka la wanrah ka jingïakhih kaba jur bha ha NEHU naduh u Naiwieng jong u snem ba la dep.
Ha ka jingïalang ka EC ha Delhi, na ka liang ka NEHUTA ka la ong ba kane ka jingïakhih ka dei halor ka jingwan jong u ban wan sha Shillong, ha kaba ki samla pule, ki nonghikai ki la kynnoh ïa u ba dei u bym ler kam shuh.
Ka NEHUTA ka la pynkynmaw ruh ba ha ka jingwan jurip jong ka kynhun Ministry of Education sha Shillong ha ka 22 tarik u bnai Jymmang, 2025, la mynjur ba ka jingïalang kaba khatduh kaba long ha ka 30 tarik u Jymmang kan dei ka jingïalang kaba khatduh ban pynïaid da u Prof. Shukla, ha kaba hadien kane ki Pro-Vice-Chancellor kin pynïaid ïa ka kam jong Vice-Chancellor kaba long katkum ki kyndon jong ka university.
Na ka liang ka seng ka la kynnoh ba u Prof. Shukla ba u la tuklar ïa ki kam jong ka university ha baroh ki liang.
Ka seng ki nonghikai ka la buh ruh ka jingkylli halor ki jingpynlutksan ki bym don nongrim ha ka leit ka wan bad ki jingsiew ba pynlong ïa ka jingïalang ha Delhi.
La kdew ruh ba ka Ministry of Education lyngba ka jingbthah ka F. No. 20-13/2024-CU.IV, dated August 20, 2024) la ong ba baroh ki skulbah kiba pynïaid da ka sorkar pdeng ba kin pynlong ïa ki jingïalang, khnang ban pynthikna ïa ka jingtreikam kaba khuid ba suba ha baroh ki kam.
“Ka NEHUTA ka pynrem jur ïa kane ka jingtuklar ba shimet jong u Prof Shukla bad kyntu ïa ki bor pynïaid ba kim dei ban pynlut kai ïa ka pisa jong ka university shabar ka nongbah Shillong,” ong ka seng da kaba pynpaw ruh ba ka long kaba kloi ban ïada ïa ka bha ka miat jong kane ka skulbah.
