Nongstoiñ, Nailur, 28: Ka jingpynmih jong ka sorkar ïa ka jingpynbna ba ïa ka Meghalaya Energy Corporation Limited Riangdo Sub division, kan ai wai noh ha kawei ka kompeni shimet, ka la pynkhih win puk ïa ki paitbah bad ruh ïa ki nongïalam jong ka Meghalaya Youth Federation Mawshynrut circle, ha kaba ka la pynpaw ïa ka jingpyrshah kaba jur halor katei ka jingthmu jong ka sorkar.
Ha u kyrwoh ba la pyllait mynta ka sngi da u samla Pynshai Kharbani President ka Mawshynrut circle, la ong ba kam jingpyrshah jong ka seng halor katei ka jingthmu, ka dei namar ba kim lah satia ban shaniah ïa ki kompeni shimet. Namar wat mynta ba kitei ki kompeni shimet kim pat shimti ruh, ka bording kam ju biang satia bad ka jinglip ka long khah khah man la ka sngi bad man la ka miet, haduh ba ki paitbah nong pyndonkam bording ki la ud la thnum, namar ka bai thang pat kam ju duna hynrei ka nangkiew katba nang mih ki sngi.
Utei u nongïalam ka seng u la ong ruh ba ka jingpynbna jong ka sorkar ban aiti sha ki kompeni shimet khlem da pynlong kino kino program ban pynshai paitbah, ka long kaba shu leh hak dak khlem da burom satia ïa ki nongpyndonkam bording, kiba pynmih pisa man u bnai ban siew sha ka sorkar lyngba ka MeECL. Ha kajuh ka por u la ong ba lada ka sorkar ka la ai wai ha ki kompeni shimet, kin sa leh katba mon bad kan wanrah ïa ka jingsngewsih kaba khraw ïa ki paitbah jong ka Mawshynrut Civil Sub division baroh kawei.
