Mawkyrwat, ‘Nailar, 12: Ka Khasi Student’s Union (KSU) jong ka South West Khasi Hills District mynta ka sngi ka 11/08/2025 ka la pynpaw ïa ka jingpyrshah kaba jur halor ka jingthmu ai jaka u Syiem jong ka Hima Maharam ïa ki shipai Border Security Forces (BSF) ha jan ka Wah Photmula kaba dei ha ka surok Ranikor, Khatpra, Photktoh, Shillong bad kiba dei ki jaka kiba ju rep ju riang da ki khasi kiba dei ki khun ki hajar jong ka Hima Maharam.
U bah Forwardman Nongrem uba bat kum u President Khasi Student’s Union (KSU) jong ka South West Khasi Hills District haba kren ha ki lad pathai khubor lyngba ka Press Conference u ong ba ka seng hadien ba ka la don ka jingpynsngew na ki khun ki hajar ka Hima Maharam ba sah sha kito ki thaiñ, mar mar kum ka seng kaba peit ïa ka bha ka miat jong ki paidbah ka pynpaw ka jingpyrshah kaba jur lada ka Hima kan ïaid shakhmat ban ai jaka ïa ki shipai ha kito ki thaiñ.
“Ka khyndew Hima kam dei ka nongkynti shimet jongno jongno. U syiem bad ka Durbar Hima ki dei tang ki nongpeit nongkhmih bad ym kita kiba lah ban die ban bynda katba mon ïa ka jaka ka bym dei ka nongkynti shimet jong ki khamtam ban leit aiti sha ki shipai”, ong u bah Nongrem. Namarkata, haba ïa dei bad kane ka kam, kum ka seng ka dawa na u Pa’iem Niandro Syiemiong bad ka Dorbar ba ki dei ban pynsangeh noh shisyndon ïa katei ka jingrai ban ai jaka sha ki shipai.
Ha ka jingkren jong u, u la bynrap ruh ba ka jingai jaka sha ki shipai kan sa ktah ïa ka shongsuk shongsaiñ jong ki paidbah kumba la ju ïohi teng, aratd ba kane ka jaka ka ïa jan bad ka shnong Photeitsim bad kaba dei ruh ka jaka rep jaka riang jong ki khasi. Shuh shuh u bah Nongrem u la ong ruh bad kane ka jaka ba mut ban ai sha ki shipai ka don ïa ka wah bad ki kshaid ba itynnad kaba lah ban kyntiew ïa ka kam jngohkai ha kane ka thaiñ.
“Lada u Syiem bad ka Dorbar Hima ki kwah ban ai jaka, ki dei ban ai bad ki jaka ba ïa jan ka jingker sai-nar bad ka Bangladesh ym ban ai sha ki jaka ba la kham pajih namar lada ai, u shipai u kwah jaka wat ha Mawkyrwat ruh”, u la bynrap.
Kumta ka seng ka maham jur ïa u Syiem bad ka Dorbar Hima ba ki dei ban weng noh ïa katei katei ka jingrai ban ai jaka ïa ki shipai BSF lem kumta ka seng kam banse ban shim da kiwei ki sien jam kiba tyngeh.
