Pyrshah ka KHNAM ïa ka rai ki 2 Myntri Rangbah ban buh da ki CRPF ha ki jaka ïakajia pud

Shillong, Risaw 01 : Ka Khun Hynniewtrep National Awakening Movement (KHNAM) ha ka sngi U Blei, ka la pynpaw ïa ka jingbymsngew ïahap bad sngew pyrshah ïa ka rai jong ka jingïalang ki Myntri Rangbah ka Assam-Meghalaya ban weng noh ïa ki Pulit na baroh arjylla na ki jaka ïakajia pud bad buh bujli noh da ki CRPF.
“Kum ka party ngim sngewtynnad satia ïa kane ka rai jong ki CM ka Assam bad Meghalaya ban weng noh ïa ki Pulit ki Jylla bad buh da ki CRPF namar ka CRPF ka dei kaba hap hapoh ka jingpynïaid jong ka Sorkar BJP bad kane kan long ka jingai kabu ïa ka Sorkar BJP ka Assam hapoh ka jingïalam u Himanta Biswa” ong u Bah Thomas Passah, Working President ka KHNAM.
“Ngi dawa jur ïa ka Sorkar ba kam dei ban weng a ki Pulit ka Meghalaya na ki Border Outpost na ka byta ka jingshngaiñ bad ka bha ka miat jong ki nongshong shnong ka Jylla” ula ong.
Ha ka sngi Saitjaiñ, u Myntri Rangbah ka Jylla Conrad K Sangma ula ïathuh ba ka jingïalang ki ar Jylla ki la pynpaw ïa ka jingsngewkhia halor ka jingmih ki jingkynad ha Block-I bad ka thaiñ Khanduli-Psiar kiba don ha khappud ka West Jaintia Hulls bad Karbi Anglong.
U Myntri Rangbah u pyntip ba ki artylli ki Jylla ki la rai ban buh noh da ki Central Reserve Police Force (CRPF) kum ki bor pahara ka bym ïashah liang ha ki jaka ba don jingïakajia.